İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 362 Hüküm no: 307 Orijinal metin no: [59b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yangında zarar gören Sepetçi Hanı’nın tamir masraflarını handaki gedik sahiplerinin aralarında paylaşacakları Sepetçi Hânı ta‘mîri husûsu Ma‘rûz Nezâret-i dâ‘îlerinde olan evkāfdan Mevlânâ Molla Hüsrev nâm sahibü’l-hayr vakfı müstagallâtından İstanbul’da Çarşı-yı Kebîr’de Kalpakçılarbaşı nâm mahâlde vâki‘ şehriye dört yüz akçe icâre-i müecceleli Sepetçi Hânı demekle meşhûr fevkāb [fevkānî] yirmi beş bâb ve tahtânî yirmi iki bâb oda ve kapı dâhilinde üç bâb dekâkîni müştemil bir bâb hân-ı kebîrin fevkānî nerdübân başından i‘tibâr ile ikinci bir bâb odanın şehriye yüz doksan para ve on altıncı bir bâb odanın şehriye kezâlik yüz doksan para ve yirmi ikinci bir bâb odanın şehriye kezâlik yüz doksan para ve yirmi dördüncü bir bâb odanın şehriye iki yüz otuz para kirâ ile müşâhereten müste’ciri el-Hâc Ömer Ağa b. Sarı Hacı Mahmud ve yedinci bir bâb odanın şehriye yüz doksan para kirâ ile müşâhereten müste’ciri Çizmeci Ebûbekir Ağa b. Osman nâm kimesneler ile hân-ı mezkûr kapısından girerken sağ cânibinden i‘tibâren tahtânî dördüncü bir bâb oda ma‘a câmekânın şehriye iki yüz kırk para ve kapı dâhilinde sol tarafda kâin birbirine muttasıl iki bâb terzi dükkânlarının şehriye yüzer paradan cem‘an iki yüz para kirâ ile müşâhereten müste’ciri Derzi Andon v. Aleksandıra ve on dördüncü bir bâb oda ma‘a câmekânın şehriye iki yüz altmış para kirâ ile müşâhereten ve müştereken müste’cirleri İpekçi Mîzâncı Mihal v. Abraham ve Panayot v. Dimitri zimmîler meclis-i şer‘-i münîrde hân-ı merkūmun şehriye seksen beş akçe sekiz pul hissesine mutasarrıfe olan Şerife Âişe Hanım bt. es-Seyyid Mehmed Emin ve yetmiş altı akçe iki buçuk pul hissesine mutasarrıfe olan Şerife Nimetullah Hanım bt. es-Seyyid Ahmed taraflarından zikri âtî husûsu tasdîka vekîl-i şer‘îleri Rumeli kuzâtından es-Seyyid Mehmed Şâkir Efendi b. es-Seyyid Hüseyin Nimet Efendi ve otuz sekiz akçe bir buçuk pul hissesine tefevvüzan ve yüz akçe hissesine intikālen mutasarrıfe olan Şerife Azime Hanım bt. Yorganî el-Hâc İbrahim Ağa ve yüz akçe hissesine intikālen mutasarrıfe mezbûrenin er karındaşı kızı Şerife Hadîce Hanım bt. es-Seyyid Süleyman ibnü’l-merkūm el-Hâc İbrahim Ağa nâm sagīrenin vâlidesi ve bâ-hüccet vasîsi Fâtıma Hanım bt. Abdullah taraflarından kezâlik zikri âtî husûsu tasdîka vekîl-i şer‘îleri es-Seyyid Mehmed Şemseddin Ağa b. es-Seyyid Feyzullah Efendi muvâcehelerinde hân-ı mezkûrun fevkānî odalarından üçüncü bir bâb odanın şehriye yüz doksan para ve sekizinci bir bâb odanın şehriye iki yüz para kirâ ile müşâhereten müste’ciri Hançerigüzel es-Seyyid el-Hâc Mehmed Ağa b. es-Seyyid İbrahim ve dördüncü bir bâb odanın şehriye yüz doksan para kirâ ile müşâhareten müste’ciri Keklik oğlu es-Seyyid Hâfız Mustafa Efendi b. es-Seyyid Mehmed ve altıncı bir bâb odanın şehriye kezâlik yüz doksan para kirâ ile müşâhereten müste’ciri Çizmeci Mehmed Ağa b. Hasan ve dokuzuncu bir bâb odanın şehriye iki yüz para kirâ ile müşâhereten müste’ciri Dilsiz oğlu es-Seyyid Mehmed b. es-Seyyid Ali ve on birinci bir bâb odanın şehriye kezâlik iki yüz para kirâ ile müşâhereten müste’ciri Mestçi Çivelek Ahmed Ağa b. el-Hâc Ali ve on ikinci bir bâb odanın şehriye yüz yetmiş para kirâ ile müşâhereten müste’ciri Çizmeci es-Seyyid Hüseyin Ağa b. Hasan ve on üçüncü bir bâb odanın şehriye yüz doksan para kirâ ile müşâhereten müste’ciri Çizmeci es-Seyyid Mustafa Ağa b. Koca Osman ve kapı üzerinde kâin on dördüncü bir bâb odanın şehriye iki yüz otuz para kirâ ile müşâhereten müste’ciri es-Seyyid Mehmed Ağa b. es-Seyyid el-Hâc Ömer ve on sekizinci bir bâb odanın şehriye yüz doksan para kirâ ile müşâhereten müste’ciri Kastamonulu es-Seyyid Mehmed Ağa b. es-Seyyid Mehmed ve on dokuzuncu bir bâb odanın şehriye yüz doksan para ve yirmi üçüncü bir bâb odanın kezâlik yüz doksan para kirâ ile müşâhereten müste’ciri Na‘lband oğlu es-Seyyid Mehmed Ağa b. Ahmed ve yirminci bir bâb odanın şehriye kezâlik yüz doksan para kirâ ile müşâhereten müste’ciri Sahtiyâncı es-Seyyid Ömer Ağa b. es-Seyyid Mehmed ve yirmi birinci bir bâb odanın şehriye yüz doksan para kirâ ile müşâhereten müste’ciri Camuscu oğlu Mehmed Ağa b. İbrahim ve tahtânî odalarından dokuzuncu bir bâb odanın şehriye iki yüz seksen para kirâ ile müşâhereten müste’ciri Bekçi Ali Ağa b. İbrahim ve on beşinci bir bâb odanın şehriye iki yüz para kirâ ile müşâhereten müste’ciri mütevellî Ali Ağa b. Veliyüddin ve yirminci bir bâb oda ma‘a câmekânın şehriye iki yüz kırk para kirâ ile müşâhereten müste’ciri Balmumcu Hüseyin Ağa b. Abdullah nâm kimesneler ile üçüncü bir bâb odanın şehriye iki yüz yirmi para kirâ ile müşâhereten müste’ciri Çukacı Mazriyo v. Yorgi ve yedinci bir bâb oda ma‘a câmekânın şehriye iki yüz yirmi para kirâ ile müşâhereten müste’ciri Kalpakçı Aleko v. Nikola ve onuncu bir bâb odanın şehriye yüz yetmiş para kirâ ile müşâhereten müste’ciri Derzi Maroke v. İsayi ve on ikinci bir bâb odanın şehriye iki yüz yirmi para kirâ ile müşâhereten müste’ciri Kazzâz Oseb v. Agop ve on üçüncü bir bâb oda ma‘a câmekânın şehriye iki yüz altmış para kirâ ile müşâhereten <> ve müşâreketen müste’cirleri Ütücü Ohan v. Bağdısar ve Mirican v. Agop ve on altıncı bir bâb oda ma‘a câmekânın şehriye iki yüz altmış para kirâ ile müşâhereten müste’ciri Derzi Yanko v. Manol ve on yedinci bir bâb odanın şehriye iki yüz kırk para kirâ ile müşâhereten müste’ciri Baratacı Sotri v. Hristo ve on sekizinci bir bâb odanın şehriye yüz yetmiş para kirâ ile müşâhereten müste’ciri Kalpakçı Bonyat v. Karabet ve on dokuzuncu bir bâb odanın şehriye iki yüz para kirâ ile müşâhereten müste’ciri diğer Sotri v. Yanko ve kapı dâhilinde sağ tarafda kâin bir bâb dükkânın şehriye yüz on para kirâ ile müşâhereten müste’ciri Kaplan postçu Kirkor v. Mıgırdıç zimmîler ile memşâ ittisâlinde on birinci bir bâb odanın şehriye yüz otuz para kirâ ile müşâhereten müste’ciri Kazzâz Nesim v. İsak Yahûdî asâleten ve fevkānî odalarından nerdübân başında memşâlara muttasıl ibtidâki bir bâb odanın şehriye yüz doksan para ve yirmi beşinci bir bâb odanın şehriye kezâlik yüz doksan para kirâ ile müşâhereten müste’ciri Gabar oğlu el-Hâc Ali Ağa b. Ali nâm kimesne tarafından husûs-ı âtîde vekîl-i sâbitü’l-vekâlesi Sahtiyâncı es-Seyyid Mustafa Ağa b. es-Seyyid Ömer ve on beşinci bir bâb odanın şehriye yüz doksan para kirâ ile müşâhereten müste’ciri eşrâf-ı kuzâtdan Çavuş-zâde es-Seyyid el-Hâc Mehmed Salih Efendi b. Hüseyin tarafından kezâlik husûs-ı âtîde vekîl-i sâbitü’l-vekâlesi es-Seyyid Mustafa Efendi b. es-Seyyid Mehmed Tahir ve tahtânî odalarından altıncı bir bâb oda ma‘a câmekânın şehriye iki yüz yirmi para kirâ ile müşâhereten müste’ciri Veznedârbaşı Ahmed Ağa b. Mehmed tarafından kezâlik husûs-ı âtîde vekîl-i sâbitü’l-vekâlesi Mehmed Nuri Ağa b. Mehmed Emin ve yirmi birinci bir bâb oda ma‘a câmekânın şehriye yüz altmış beş para kirâ ile [60a] müşâhereten müste’ciresi Zeyneb bt. Mehmed nâm hatunun zevci ve kezâlik husûs-ı âtîde vekîl-i sâbitü’l-vekâlesi Bostânî es-Seyyid Ebûbekir Ağa b. es-Seyyid Mustafa nâm kimesne ile ibtidâki bir bâb odanın şehriye üç yüz yirmi para kirâ ile müşâhereten müste’ciresi Sâ‘atçi Serope zimmî zevcesi Takohi bt. Noviç Nasrâniye tarafından kezâlik husûs-ı âtîde vekîl-i sâbitü’l-vekâlesi Kuyumcu Papasoğlu Ohannes v. Tatos ve ikinci bir bâb duhânî odasının şehriye yüz altmış para kirâ ile müşâhereten müste’ciresi Sara bt. İstefan Nasrâniyenin sadrî oğlu tarafından kezâlik husûs-ı âtîde vekîl-i sâbitü’l-vekâlesi Dülbendci Canik v. Kozmoz ve beşinci bir bâb odanın şehriye iki yüz kırk para ve yirmi ikinci bir bâb odanın şehriye iki yüz altmış para kirâ ile müşâhereten müste’ciresi Harupsima bt. Kirkor Nasrâniyenin zevci ve tarafından kezâlik husûs-ı âtîde vekîl-i sâbitü’l-vekâlesi Kazzâz Parnik v. Avanes zimmîler hazır oldukları hâlde hân-ı mezkûrun fevkānî yirmi iki bâb ve tahtânî yirmi bir bâb odalarında gerek biz ve gerek hâzırûn-ı asîl ve müvekkil-i merkūmûn ve fevkānî beşinci bir bâb odada şehriye iki yüz on para kirâ ile gāib ani’l-beled Nakkāş Mustafa ve onuncu bir bâb odada şehriye iki yüz para kirâ ile müteveffâ Sarı Osman bilâ-gedik ve on yedinci bir bâb odada şehriye yüz doksan para kirâ ile mefkūd Bolulu Ali Ağa bilâ-gedik ve tahtânî sekizinci bir bâb odada şehriye iki yüz para kirâ ile gāib ani’l-meclis Sarrâf Ohannes v. Vaks zimmî müşâhereten müste’cirler ve derûnlarında mevcûde mutasarrıflarından alınmış yedimizde olan memhûr tezkireler mantûkunca gedik ta‘bîr olunan eşyâ-i ma‘lûme her birimizin beynimizde mu‘teber emvâlimiz olup ancak hân-ı mezkûrun bundan akdem bi-kazâillâhi te‘âlâ vukū‘ bulan harîkde bir mikdâr mahalli muhterik ve bir mikdâr mahalli münhedim olmağla kârgir olmak üzere inşâsına sudûr eden fermân-ı âlî-şâna imtisâlen bu def‘a bizler odahâ ve dekâkîn-i mezkûre müste’cirleri hâzırûn-ı asîl ve müvekkilûn-ı merkūmûnun hisselerinde bi-şartı’r-rücû‘ emrleriyle hân-ı mezkûru ta‘mîr ve tecdîde mutasarrıfeleri asîl ve vasîyy-i müvekkilât-ı mezbûrâtın izinleriyle mübâşeret eylediğimizde mutasarrıfeleri müvekkilât-ı mezbûrât Şerife Âişe ve Şerife Nimetullah ve Şerife Azîme Hanımlar kendi mâllarından ve vasîyy-i mezbûre Fâtıma Hanım ve vasîsi olduğu kızı sagīre-i mezbûre Şerife Hadice’nin mâlından bi’l-izni’ş-şer‘î her biri alâ-kadri’l-hısas cem‘an altı bin guruş imdâdiye olarak vekîlân-ı mezbûrân yedleriyle bize def‘ ü teslîm ve hân-ı mezkûrun ta‘mîrine sarfla istihlâke emreylediklerinde biz dahi ahz ü kabz ve emrleriyle hân-ı mezkûra sarfla istihlâk ve ziyâde sarf olunacak mebâliği müste’cirûn-ı hâzırûn-ı asîl ve müvekkilûn-ı merkūmûn ile her birimiz kırk yedi bâb oda ve üç bâb dekâkîne taksîm ederek teberru‘an li’l-vakf harc ve sarf edip mutasarrıfeleri müvekkilât-ı mezbûrâtdan kat‘a nesne mutâlebe etmemek üzre ta‘ahhüd eyledik deyü mukırrûn-ı merkūmûnun bi’l-cümle sâdır olan kelimât-ı meşrûhalarını vekîlân-ı mezbûrân ile hâzırûn-ı müste’cirûn-ı asîl ve müvekkilûn-ı merkūmûndan her biri tasdîk ve müste’cirûn-ı asîl ve vekîl-i merkūmûndan her biri hisselerinde kendülere ve müvekkillerine rücû‘ şartıyla emrlerini ikrâr ve i‘tirâf eyledikleri İstanbul Mahkemesi’nden huzûr. Fî 19 Rebî‘ülâhir sene 1242 Gereği gibi mukābele-şüd