İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 365 Hüküm no: 308 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstefan v. Covanni’nin mahzen gediğini, Elya v. Salamon’a sattığı Kârgir mahzen gediği mübâya‘ası Ma‘rûz Tüccârdan İstefan v. Cuvani nâm zimmî meclis-i şer‘-i münîrde sahib-i arzuhâl Elya v. Salamon Yahûdî muvâcehesinde mahrûse-i Galata’da Sa[n]francisko mahallesinde köşe başında vâki‘ beher şehr on beş guruş kadîm kirâlı bir bâb kârgir mahzen derûnunda mevcûde gedik ta‘bîr olunur bir destgâh ve yirmi fuçı ve bir terâzi ma‘a derâhim ve beş sandalye ve sâir âlât-ı lâzıme-i ma‘lûme bâ-sûret mâlım olmağla hâlâ ben ber-vech-i muharrer mâlik olduğum âlât-ı gedik-i mezkûru tarafeynden bi’l-îcâb ve’l-kabûl bâtten ve sahîhan bi-safkatin vâhidetin mersûm Elya Yahûdiye iki bin beş yüz guruş semen-i makbûza bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra bey‘-ı mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik fîmâ-ba‘d âlât-ı gedik-i mezkûr mersûm Elya Yahûdinin mal-ı müşterâsı ve hıkk-ı sırfı olup benim kat‘a alâkam kalmamışdır deyü ba‘de’t-takrîr ve’t-tasdîk gedik-i mezkûrun kaleminde mersûm İstefan zimmî ismine olan kayd-ı atîki ref‘ ve terkīn ve mesfûr <> Elya Yahûdî ismine tasrîhan kayd ile yedine bir kıt‘a sûret i‘tâsını istid‘â eyledikleri İstanbul Mahkemesi’nden huzûr. Fî 22 Ş sene 1242