İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 369 Hüküm no: 313 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Berat Kandili gecesinde camilerin minarelerindeki kandillerin yakılmasına dair hüküm
İ‘lâm-ı kandil-i Berât-ı şerîf
Bâ-sahh-ı âlî
İstanbul Kādısı fazîletlü efendi işbu i‘lâm-ı rikâb-ı hümâyûn-ı şâhâneye lede’l-arz mûcibince îkād-ı kanâdîl olunmak üzre kayyûmbaşılara tenbîh oluna deyü hatt-ı şerîf-i mülûkâne şeref-yafte-i sudûr olmağla mantûk-ı münîfini icrâ eyelesin deyü.
Fî 14 Ş sene 1242
Atebe-i bend-i unvân-ı saltanat ve südde-i feyz-idde-i şevket hâk-i tâb-nâkine ma‘rûz-ı abd-i dâ‘î-i bî-istitâ‘ât oldur ki
İşbu sene-i müstebti‘atü’l-hasene-i Receb-fevz-meşrebinin selhi olan Sülâsa gecesi gül-çehre-i hilâl-i Şa‘bân-ı şerîf ravza-i manzara-i ufk-ı garbîyi teşrîf kıldığı ber-nehc-i şerî‘at-i garrâ tescîl-zîb-i hükm ve imzâ olup ol vech-i müvecceh ile gurre-i garrâ-yı şehr-i merkūm Salı gününden sâbite ve on beşinci Salı gecesi gişt-zâr-ı leyle-i Berât-ı mağfiret sâbite olmağla deydene-i dîrîne-i Devlet-i müeyyede ve kā‘ide-i hasenât-ı fâide-i saltanat-ı müeyyede üzre ol leyle-i kadr-ı adîlede serv-i ser-firâz-ı minârât tezyîn-i kanâdîl ile tûbâ-âyât kılınmak bâbında fermân-ı âlî-şân ısdârı iktizâ eylediği İstanbul Mahkemesi’nden âsitân-ı felek-bünyânlarına i‘lâm olundu bâkī emr u fermân hazret-i veliyyü’l-emrindir.
Fi’l-yevmi’l-hâdî aşer mine’ş-şehri’l-merkūm li-seneti isneteyn ve erba‘în ve mieteyn ve elf
|