İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 370 Hüküm no: 315 Orijinal metin no: [61a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabun tüccarı Midillili Panaki’nin, ortağı Sabun Nâzırı Mehmed Ağa ile 3250 guruşa sulh olduğu 3250 guruşa sulh ve şirketden ibrâ Ma‘rûz Sabun tüccârından sahib-i arzuhâl Midillili Yanaki v. Puhla nâm zimmî meclis-i şer‘-i hatîrde şerîki olup hâlâ sabun nâzırı derûn-ı arzuhâlde mezkûru’l-ism Giridî Tiryâkizâde Mehmed Ağa b. Mustafa nâm kimesne tarafından husûs-ı âti’l-beyânda vekîl olduğu sabuncu Giridî Mustafa Ağa b. Mehmed ve Giridî Ali Ağa b. Mehmed nâm kimesneler şehâdetleriyle ber-nehc-i şer‘î sâbit olan tüccâr-ı merkūmeden Giridî Habib Ağa b. Veliyüddin nâm kimesne muvâcehesinde ben târih-i i‘lâmdan üç sene mukaddem mâlımdan yedi bin beş yüz guruş ve müvekkil-i mezbûr Mehmed Ağa dahi mâlından yedi bin beş yüz guruş ki cem‘an on beş bin guruş ifrâz ve birbirine halt ile fâide-i hâsıla beynimizde beraber iktisâm olunmak üzre sabun ticâretinde akd-i şirket ile üç sene şerîkler olup ba‘dehû fesh-i akd-i şirket-birle ben gerek re’s-i mâlımız olan meblağ-ı mecmû‘-ı mezkûr ve gerek gayrı-ez şirket kendi mâlımla cezîre-i Midilli’de vâki‘ sabunhânem derûnunda i‘mâl ve Âsitâne-i aliyyede şerîkim müvekkil-i mezbûra irsâl edip ol dahi ahz ve âhara bey‘le istihlâk eylediği sabun ile poliçe tarîkiyle bana irsâl eylediği mebâliğin hesâbını bundan akdemce tüccâr ma‘rifetiyle tarafeynin defterlerine tatbîkan hesâb-ı sahîh ile yegān yegān rü’yet eylediğimizde benim müvekkil-i merkūm zimmetinde gerek şirket ve gerek hâric-ez şirket cem‘an altı bin iki yüz kırk altı guruş alacak hakkım zuhûr etmekle meblağ-ı mezkûru şerîkim müvekkil-i merkūm Mehmed Ağa’dan taleb ederim deyü da‘vâya tesâddî etmişdim el-hâletü hâzihî muslihûn tavassutuyla beynimiz te’lîf ve tanzîm olunup ben ber-vech-i muharrer tesâddî eylediğim da‘vâmdan vekîl-i mezbûr Habib Ağa ile bi’t-tav‘ ve’r-rızâ üç bin iki yüz elli guruş üzerine sulh olduğumda ol dahi müvekkiline izâfetle bi’l-vekâle sulh-ı mezkûru ba‘de’l-kabûl bedel-i sulh-ı mezkûrdan mâ‘adâ meblağ-ı mezkûr altı bin iki yüz kırk altı guruşa varınca ziyâdesi olan iki bin dokuz yüz doksan altı guruşa ve bi’l-cümle husûs-ı şirkete ve hesâbda galat vukū‘una ve işbu târih-i i‘lâma gelince sâir beynimizde cereyân eden cemî‘ ahz ve i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika mutlaka âmme-i de‘âvî ve kâffe-i mutâlebâtdan tarafeynden her birimiz âharın zimmetini ibrâ-i âmm-ı sahîh-i şer‘î ile bi’l-asâle ve bi’l-vekâle ibrâ ve ıskāt ve her birimiz ber-vech-i muharrer âharın asâleten ve vekâleten ibrâsını kabûl etmemizle ba‘de’l-yevm tarafeyn yedinde gerek poliçe tahvîli ve gerek evrâk-ı sâire zuhûr eder ise kat‘a amel ve i‘tibâr olunmasın deyü ba‘de’l-ikrâr ve’t-tasdîk vekîl-i mezbûr Habib Ağa ibrâdan müstesnâ bedel-i sulh-ı mezkûr üç bin iki yüz elli guruş müvekkili [müvekkil-i] mezbûrun zimmetinde müdde‘î-i mersûma sahîhan deyni olduğunu tâyi‘an ve kat‘iyen bi’l-vekâle ikrâr ve i‘tirâf etmeğin alâ-mûcib-i i‘tirâfihî bedel-i sulh-ı mezkûr üç bin iki yüz elli guruşun müdde‘î-i mersûm Yanaki zimmîye edâ ve teslîmiyle vekîl-i mezbûr Habib Ağa ilzâm olunduğu İstanbul Mahkemesi’nden huzûr. Fî 23 Ş sene 1242 Nüshateyn