İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 376 Hüküm no: 322 Orijinal metin no: [62a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal kasabasındaki uncu taifesinin, Kapan-ı dakikden gelen unun nakliye esnasında ıslandığında dair şikâyetleri Kartal kasabasında olan habbâza dâir dakīk maddesi Ma‘rûz Medîne-i Üsküdar’a muzâfe Kartal kasabasında mütemekkin uncu tâifesinden Filibos v. Kukas ve şerîki Vartan v. Atam nâm zimmîler lisânen sâdır olan fermân-ı âlîlerine imtisâlen evvelen Çarşamba günü Arz Odası’nda huzûr-ı lâmi‘u’n-nûr-ı âsafânelerinde ve ba‘dehû dâ‘îhânelerinde hâlâ zahîre nâzırı ricâl-i Devlet-i Aliyye’den Mehmed Ârif Efendi bendeleri ve Kapan-ı dakīk nâibi Mehmed Nuri Efendi dâ‘îleri ve habbâzân kethudâsı Ali Ağa ve uncular kethudâsı Abdülbaki Ağa ve reisler kethudâsı es-Seyyid el-Hâc Veliyüddin Ağa ve bi’l-cümle kapan tüccârı ve habbâzân nizâm ustaları ve uncu esnâfı hazır oldukları hâlde akd olunan meclis-i şer‘-i münîrde kasaba-i mezbûrede mütemekkin habbâz esnâfından Yorgi v. Yani ve Dimitri v. Yorgi ve Kiryako ve Petro veledey Hristo nâm zimmîler muvâcehelerinde mersûmûnun yedlerinde olup işbu sene-i mübâreke Saferü’l-hayrının on birinci günü târihiyle müverrah Çarşamba günü Arz Odası’nda mürâfa‘adan verilen bir kıt‘a i‘lâmda tasrîh olunduğu üzre zikrolunan Kartal kasabası ahâlîsinin zarûretden vikāyeleri’çün Kapan-ı dakīkden narh üzre uncusuna buğday verilip uncu dahi ba‘de’t-tahn kezâlik narh üzre ekmekçiye bey‘ ve ekmekçi dahi Âsitâne narhı üzre nân-ı azîz i‘mâl ve tabh ve ibâdullâha bey‘ etmek kadîmden beri bâ-fermân-ı âlî mer‘î ve mu‘teber şurût-ı nizâmımızdan olup lâkin Kartal kasabasının Âsitâne-i aliyyeye hayli bu‘du olduğundan zahîre nakli külliyetli maguna [mavna] ücretine muhtâc olduğundan başka emvâlimiz gâh fırtınaya rast gelip kazâ-zede ve gâh bârâna tesâdüfle ıslanıp fenâ-pezîr olarak dâimâ mutazarrır ve rahne-dâr olup ve nân-ı azîzin narhı kurudan olmağla su ile tahmîr olundukda zımnında olan menâfi‘ ekmekçiye âid olduğuna nazaran nakliye mesârifini mesfûrunun ta‘ahhüd etmeleri zahîr-i hâle mutâbık olmak hasebiyle masraf-ı mezkûra medâr ve aralıkda vukū‘ bulan ıslanma ve sâir terettüb eden zararı cebr ve tekmîl için fîmâ-ba‘d dakīkin beher vakıyyesinde narh-ı cârîsinden üçer akçe ziyâde verecek olduklarında biz dahi râzı olup nâzır-ı mûmâ-ileyh ve sâirleri istisvâb eyledikleri İstanbul Mahkemesi’nden huzûr-ı âlîlerine i‘lâm olundu. Fî 22 B sene 1242