İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 382 Hüküm no: 329 Orijinal metin no: [63a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ressam basmacı esnafının, iğne kalıpları imalini tekellerine almalarının engellenmesi Ressâm basmacı esnâfına müte‘allik men‘ Ma‘rûz Âsitâne-i aliyyede vâki‘ çevre ve uçkur ve havlu ve makrame ve sâir bu misillü eşyâ i‘mâli’çün dülbend ve patista ve hümâyûn ve hâssa ve emti‘a-i sâire-i mütenevvi‘a üzerine sûzenî nakş eden ressâm basmacı esnâfı kethudâsı es-Seyyid Mehmed Emin Ağa ve yiğitbaşısı es-Seyyid Ahmed ve esnâfından es-Seyyid Mehmed ve Mehmed İzzet ve es-Seyyid Abdullah ve es-Seyyid Yahya ve es-Seyyid Mustafa ve es-Seyyid Ömer ve es-Seyyid İbrahim ve sâirleri meclis-i şer‘-i münîrde sûzenci tâifesinden sahib-i arzuhâl Mıgırdıç v. Bedros ve Avanes v. Artin nâm zimmîler muvâcehelerinde biz İstanbul’da Sultân Bâyezid havlîsi ve Çarşı-yı Kebîr’de kâin yirmi bâb dükkânda mesâkinler ressâm esnâfı olmamızla bâlâda imâ olunduğu üzre gerek nakış olunacak eşyânın resim ve nakışı ve gerek kalıblarının hak ve i‘mâli bizim san‘atımız olmağla bu âna kadar âharın müdâhalesi mesbûk ve ma‘rûf değil iken zimmiyân-ı mersûmân işleyecekleri sûzenin kalıblarını hak ve resmini tab‘ ve nakış etmeleriyle bu keyfiyet beyne’l-esnâf mer‘î olan nizâmımıza mugāyir olduğundan men‘ olunup işleyecekleri eşyâyı bize getirip resmini tab‘ ü temsîl ettirdikden sonra i‘mâl etmelerine cebr olunmak murâdımızdır deyü da‘vâ edip lâkin evvelen iddi‘â-yı inhisâr iltifâta şâyân olmadığından mâ‘adâ kendi takrîrleri üzre âharın eşyâsını resm ü nakş etmiş dahi değiller iken yalnız kendi işleyecekleri eşyâda men‘e kādir olmadıkları ressâm esnâfı merkūmûna tefhîm olunduğu İstanbul Mahkemesi’nden huzûr-ı âlîlerine i‘lâm olundu. Fî 27 Ş sene 1242