İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 382 Hüküm no: 330 Orijinal metin no: [63a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çanak çömlek atılarak yapılan ayinde ölen Melkon v. Ohannes’in veraseti ve 1000 guruş diyet hükmü Diyetden 1000 guruşa sulh Ma‘rûz Vezîr-i mükerrem sa‘âdetlü atûfetlü ser-asker paşa hazretlerinin işbu müzekkirelerine merbût arzuhâl hâmişinde mastûr keşif i‘lâmı nâtık olduğu üzre Anadolu’da Van kasabası mahallâtından Kenîsa mahallesi re‘âyâsından olup İstanbul’da Balkapanı civârında vâki‘ Kādı Hânı odabaşısı iken ber-vech-i âtî hâlik olan berber oğlu Melkon v. Ohannes v. Toma nâm zimmînin verâseti kasaba-i mezbûrede mütemekkineler anası Hanoma bt. Eyva ve zevcesi Margarite bt. Atam Nasrâniyeler ile hâlik-i mersûmun babası mersûm Ohannes zimmînin li-ebeveyn er karındaşı Agop zimmînin sulbî oğlu Kasber zimmîye münhasıra olup bunlardan gayrı vâris ve terekesine müstehıkk-ı âharı olmadığı kasaba-i mezbûre re‘âyâsından İstanbul’da mütemekkin Ayvaz Avadik v. Manuk ve Kigork v. Kirkor nâm zimmîler şehâdetleriyle mahzar-ı hasm-ı münkirde da‘vâ-yı sahîha zımnında ber-nehc-i şer‘î sâbit ve sübût-ı verâsetlerine hükm-i şer‘î lâhık <> oldukdan sonra mersûm Kasber zimmî meclis-i şer‘-i münîrde Odunkapısı hamallarından Sahak v. Serkiz zimmî muvâcehesinde Mart gecesi çanak çömlek atıp kırmak âyin-i Nasârâdan olduğuna binâen mersûm Sahak zimmî işbu Şa‘bâni’l-mu‘azzamın on beşinci Mart gecesi sâ‘at bir buçukda iken zikrolunan Kādı Hânı’nın üst katından bir kebîr İnöz küpü atıp mersûm Melkon zimmînin başına rast gelmekle andan müteessiren dört sâ‘at mürûrunda hâlik olmağın ber-mûcib-i şer‘îsinden ben ancak kendi hisse-i irsiyemi mersûm Sahak zimmîden bi’l-verâse taleb ederim deyü tesâddî eylediğim da‘vâmdan bâ-tavassut-ı muslihîn mersûm Sahak zimmî ile ancak kendi hissemden bi’t-tav‘ ve’r-rızâ bin guruş üzerine sulh olduğumda ol dahi sulh-ı mezkûru ba‘de’l-kabûl bedel-i sulh-ı merkūm bin guruşdan mâ‘adâ hâlik-i mersûmun dem diyetine ve bi’l-cümle husûs-ı mezkûra müte‘allika da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik deyü takrîrini mersûm Sahak zimmî tasdîk ve bedel-i sulh-ı merkūm bin guruş zimmetinde müdde‘î-i mesfûr Kasber zimmîye deyni olduğunu ikrâr ve i‘tirâf ve ber-nehc-i şer‘î edâya ta‘ahhüd eyledikleri İstanbul Mahkemesi’nden huzûr. Fî 27 Ş sene 1242