İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 389 Hüküm no: 337 Orijinal metin no: [64b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anesti v. Atam’ın, kazzaz gediğini Feyzullah Ağa b. Mehmed’e sattığı Kazzâz gediği mübâya‘ası Ma‘rûz Âsitâne-i aliyyede vâki‘ kazzâz esnâfından Anesti v. Atam zimmî meclis-i şer‘-i münîrde bâ‘isü’l-i‘lâm Feyzullah Ağa b. Mehmed nâm kimesne muvâcehesinde takrîr-i kelâm edip İstanbul’da Çarşı-yı Kebîr’de Kalpakçılarbaşı’nda Çakır Ağa zukāğında kâin ma‘lûmü’l-hudûd iki kepenk bir bâb kazzâz dükkânı derûnunda mevcûde Başmuhâsebe’de ismime mukayyed şurût-ı nizâmda dâhil beyne’l-esnâf gedik ta‘bîr olunur akd-i âti’z-zikrin sudûruna değin bâ-sûret müstakillen yedimde mülküm olan âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin mezbûr Feyzullah Ağa’ya üç bin guruş semen-i medfû‘ ve makbûza bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve ıskāt eyledik fîmâ-ba‘d dükkân-ı mezkûr derûnunda mevcûde gedik ta‘bîr olunan âlât-ı lâzıme-i ma‘lûme mezbûr Feyzullah Ağa’nın mülk-i müşterâsı ve hakk-ı sırfı olup benim kat‘a alâka ve medhalim kalmamışdır deyü ba‘de’l-ikrâr ve’t-tasdîk gedik-i mezkûrun bâyi‘-i mersûm Anesti zimmî üzerinde olan kayd-ı evveli tay ve terkīn ve müşteri-i mezbûr Feyzullah Ağa ismine tasrîhan kayd ile kaleminden yedine müceddeden bir kıt‘a sûret i‘tâsını istid‘â ve istirhâm eyledikleri İstanbul Mahkemesi’nden huzûr. Fî 15 N sene 1242