İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 388 Hüküm no: 336 Orijinal metin no: [64a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kapatılan arpacı dükkânlarının vasî marifetiyle mallarının satılıp bedellerinin vekillerine teslim edildiği Mefkūd arpacıların vasî yedinden 356 guruş 10 para kabzı Ma‘rûz Âsitâne-i aliyyede Kapan-ı dakīk hâric ve dâhilinde vâki‘ bi’l-cümle arpacı esnâfı bundan akdem bâ-emr-i âlî vilâyetlerine i‘zâm olunmuş ve esnâf-ı merkūmenin mahâll-i merkūmda kâin dükkânları sedd ü bend ile mezbûrûnun gerek cânib-i mîrî ve gerek tüccâra olan deynleri ve ba‘zı kesân zimmetlerinde matlûbâtları alâ-hâlihî kalmış olduğundan bahisle merkūmûnun mâlları olup dekâkîn-i mezkûrîn derûnlarında mevcûd zahîreleri ma‘rifet-i şer‘ ve tüccâr ma‘rifetiyle semen-i misilleriyle âhara füruht olunarak semenleri mîrî ve kapan tüccârına olan deynlerine ba‘de’l-edâ fazla kalır ise esnâf-ı merkūme tarafına teslîm olunması bâbında ricâl-i Devlet-i Aliyye’den hâlâ zahîre nâzırı izzetlü Mehmed Ârif Efendi bendelerinin memhûr takrîri bâlâsına unvânı sahh-ı âlî ile müveşşah bu dâ‘îlerine hitâben sâdır olan fermân-ı âlîlerine imtisâlen dekâkîn-i mezkûrînin kuflü ma‘rifet-i şer‘le küşâd olundukdan sonra derûnlarında mevcûd olup kıbel-i şer‘-i şerîfden vasî nasb olunan kapan-ı merkūm tüccârından es-Seyyid Veliyüddin Yazıcı karındaşı demekle meşhûr es-Seyyid Ali Ağa b. es-Seyyid Mustafa ve tüccâr ma‘rifetleri ve semen-i misilleriyle âhara bey‘ olunan ma‘lûmü’l-keyl ve’l-fiyât erzen ve kokoroz ve şa‘îrin esmânından cem‘an elli sekiz bin beş yüz iki buçuk guruş on dokuz para vasîyy-i mezbûr es-Seyyid Ali Ağa yedinde olup esnâf-ı merkūmûnun gerek düyûn-ı mezkûre ve gerek matlûbâtı husûsu ber-mûcib-i şerî‘at-i garrâ inde’t-terâfu‘ muvâcehe-i hasm-ı şer‘î lâzımeden olduğuna binâen kendi taraflarından vekîl-i müsbet-i şer‘îleri zuhûruna değin tevkīf olunmuşdu el-hâletü hâzihî esnâf-ı merkūmeden Durak oğlu Erzâde nâm kimesnenin babası ve tarafından vekâlet-i âmme-i mutlaka ile vekîl olduğu Arpacı el-Hâc İsmail Ağa b. Hasan ve bâlâda mezkûr diyâr-ı âhara i‘zâm olunan arpacı esnâfından olup bu def‘a me’zûnen Âsitâne-i aliyyeye gelen Türk Hasan oğlu Hüseyin b. Himmet nâm kimesneler şehâdetleriyle mahzar-ı hasm-ı câhidde şer‘an sâbit ve sübût-ı vekâletine hükm-i şer‘î lâhık olan Arpacı Veliyüddin b. Hasan nâm kimesne meclis-i şer‘-i enverde vasîyy-i mezbûr es-Seyyid Ali Ağa mahzarında kapan-ı merkūm tüccârı hazır oldukları hâlde müvekkilim oğlum mezbûrun kapan-ı mezkûr hâricinde çeşme karşısında Âşık Mehmed oğlu Yusuf’un dükkânı ittisâlinde kâin sâkin olduğu bir bâb arpacı dükkânında mevcûd mâlı olup râyic-i vakt üzre beher keyli ellişer paraya olarak ma‘rifet-i şer‘le âhara bey‘ olunan cem‘an iki yüz seksen beş keyl şa‘îrin esmânı olup vasîyy-i merkūm es-Seyyid Ali Ağa’nın bi’l-vesâye makbûzu olan üç yüz elli altı guruş on parayı deyn-i mîrîsi olmadığına binâen [64b] düyûn-ı sâiresini edâ ve bâkī kalır ise kendüye îsâl ve teslîm için tamamen bana def‘ ü teslîm ben dahi bi’l-vekâle ahz ü kabz edip min-ba‘d meblağ-ı mezkûrdan müvekkilim oğlum merkūmun vasîyy-i merkūm es-Seyyid Ali Ağa yedinde bir akçe ve bir habbe hakkı ve alacağı kalmadı deyü ikrâr ve tasdîkleri İstanbul Mahkemesi’nden huzûr-ı âlîlerine i‘lâm olundu. Fî 27 Ş sene 1242