İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 390 Hüküm no: 339 Orijinal metin no: [64b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ramazan-ı şerif hilâlinin rü’yeti Sübût-ı şehr-i Ramazan-ı şerîf Bâ-sahh-ı âlî İstanbul kādısı fazîletlü efendi İşbu i‘lâmınız hâk-i pây-i hümâyûn-ı mülûkâneye lede’l-arz iktizâsı icrâ olunmak bâbında hatt-ı şerîf-i tâc-dârî sahîfe-pîrâ-yı sudûr olmağla mantûk-ı münîfi icrâ eyleyesin deyü. Fî 21 N sene 1242 Dergâh-ı merâhim-destgâh ve bârgâh-ı mekârim-penâhları türâbına ma‘rûz-ı abd-i bî-intibâh oldur ki İşbu sâl-i huceste-felek-hilâl-i Şa‘bânî-i Dersa‘âdet-güsterde Salı gününden rü’yet olunup tekmîl-i selâsîn ile gurre-i şehr-i Ramazanü’l-mübârek Perşembe günü olduğu tescîl-i zîb-i şerî‘at olmuş ise de bu def‘a hilâl-i Şa‘bâni’l-mu‘azzam İsneyn gecesi rü’yet olunduğu da‘vâ-yı sahîha-i şer‘iye zımnında Beyşehrî-zâde Tahir Efendi b. Hüseyin Efendi ve es-Seyyid Mustafa Efendi b. es-Seyyid İbrahim Efendi nâm şâhideyn-i mu‘addileyn şehâdetleriyle mahzar-ı hasm-ı câhidde ber-nehc-i şer‘î sâbit ve mütehakkık olduğundan mâ‘adâ mahrûse-i Edirne ve Bursa’da dahi ber-vech-i muharrer gurre-i Şa‘bân yevmü’l-İsneynden olarak tekmîl-i selâsîn ile gurre-i münevvere-i mâh-ı sıyâm Çarşambadan ma‘dûd ve savm-ı şerîfe yevm-i mezkûrdan bed’ olunduğunu müş‘ir iki kıt‘a i‘lâm vârid ve haber dahi ol vechile fâiz ve şâyi‘ olmağla bu sûretde şehr-i şerîf-i gufrân-redîf-i Ramazanın gurresi Çarşambadan olup yirmi yedinci İsneyn gecesi leyle-i Kadîr ve tekmîl-i sülüseyn ile Cum‘a günü îyd-ı Fıtr-ı nâşiru’l-ıtr olmak iktizâ eylediği İstanbul Mahkemesi’nden atebe-i felek-mertebeye i‘lâm olundu bâkī emr u fermân hazret-i fermân-fermânındır. Fi’l-yevmi’t-tâsi‘ aşer min-şehri Ramazani’l-mübârek li-seneti isneteyn ve erba‘în ve mieteyn ve elf.