İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 391 Hüküm no: 340 Orijinal metin no: [64b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bezzazistan-ı atikde baca ve mahzen ihdas edilmesinin engellenmesi için ferman talebi Bezzâzistân-ı atîk etrâfında dekâkîn keşfi Ma‘rûz Dârü’s-sa‘âdeti’ş-şerîfe ağası hazretleri nezâretlerinde âsûde evkāfdan İstanbul’da vâki‘ Ayasofya-i Kebîr Câmi‘-i şerîfi vakfı müsakkafâtından İstanbul’da Çarşı-yı Kebîr’de vâki‘ Bezzâzistân-ı atîkin etrâf-ı selâsesinde kâin dekâkîn mutasarrıflarının ba‘zı müste’cirleri bilâ-izn-i mütevellî bir müddetden beri dükkânları fevkinde kadîm çifte kubbesi üzerine kesb-i ziyâ için tuğladan kârgir dîvârlı ve üzeri kubbeli bâd-gîr ihdâs ve ba‘zıları dükkânları kemerlerinin tahmînen üç zirâ‘ arzında kadîm dîvârını taht ederek yarım zirâ‘ kalmış ve ba‘zıları dahi dükkânları tahtında mağaza ihdâs etmiş ve bir tarafdan dahi bu makūle mugāyir-i vaz‘-ı kadîm muhdesât peydâ etmekde olup bu vechile müsakkafât-ı vakf-ı mezkûra hasâr oldu deyü vakf-ı mezkûr mütevellîsi ağa-yı müşârün-ileyh hazretlerinin kâtibi Ahmed Reşid Efendi b. İsmail Zühdü Efendi’nin Bâb-ı Âlî’ye takdîm eylediği işbu takrîriyle inhâ ve bâlâsına sâdır olan fermân-ı âlî-şâna imtisâlen savb-ı şer‘-i enverden irsâl olunan baş kâtib İbrahim Ârif Efendi dâ‘îleri ve Haremeyn-i şerîfeyn müfettişi olup İstanbul pâyesiyle tekrîm buyrulan zâde-i Emin Paşazâde fazîletlü mîr Abdülkadir Efendi tarafından meb‘ûs Kâtib Mehmed Ârif Efendi hâssa mi‘mârı Abdülhalim Ağa ve hulefâsından Ahmed Mümtaz ve Derviş Ahmed Halîfeler ile bezzâzistân-ı mezkûra varıp baş kethudâ el-Hâc Mehmed Emin Ağa b. Abdullah ve müstahfızlarından es-Seyyid Mehmed Ağa b. Ahmed ve es-Seyyid Mehmed Derviş Ağa ve karındaşı es-Seyyid İsmail Ağa b. Zeynelabidin ve es-Seyyid Ali Efendi b. Halil ve Osman Ağa b. Ali ve Ali Ağa b. Osman ve sâirleri hazır oldukları hâlde mütevellî-i mûmâ-ileyh Ahmed Reşid Efendi’nin kethudâsı ve taraflarından umûr-ı vakfı rü’yete vekîl-i şer‘îsi es-Seyyid Mehmed Said Efendi b. el-Hâc Osman’ın irâeleriyle nazar eylediklerinde der-dest olan resmde işâret olunduğu üzre bezzâzistân-ı mezkûr ebvâbından Sahhâflar kapısından hurûcla sağ tarafda köşede vâki‘ birinci ve ikinci ve üçüncü ve dördüncü çukacı ve sol tarafında kâin üçüncü ve beşinci ve onuncu ve on ikinci sahhâf ve kılabdancı ve Fincâncılar kapısından hurûcla sağ tarafda vâki‘ üçüncü ve dördüncü kumaşcı ve kılabdancı ve sol tarafda kâin sekizinci kolancı olarak cem‘an on bir bâb dekâkîn mağazalarında bir aded bâd-gîr ve zikrolunan on ikinci kılabdancı dükkânı tahtında bir kıt‘a mahzen mevcûd olduğunu ba‘de’l-mu‘âyene [65a] kâtibân-ı mezbûrân meclis-i şer‘a inhâ ve mi‘mâr-ı mûmâ-ileyh hulefâları Çarşamba günü Arz Odası’nda huzûr-ı hazret-i sadâret-penâhîde sâlifü’z-zikr müstahfızlar ve sâir civârında olan ehl-i İslâm ve re‘âyâ muvâcehelerinde ihbâr edip ve mütevellî vekîli mezbûr Mehmed Said Efendi dahi sâlifü’l-beyân bâd-gîr ve mahzenin kadîmi vechile seddü bendini bi’l-vekâle iltimâs ve zikri dûr eden on bir aded bâd-gîr ve bir aded mahzenin seddü bendi’çün şifâhen fermân-ı âlî sudûr eylediği İstanbul Mahkemesi’nden huzûr. Fî 16 Ş sene 1242