İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 393 Hüküm no: 342 Orijinal metin no: [65a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa b. Abdullah’ın, dükkân kemeri tamirinden komşusu İbrahim Ağa b. Abdullah ile 155 guruşa sulh olduğu Çarşıda haffâf dükkânı keşfi Ma‘rûz Sâdır olan fermân-ı âlîlerine imtisâlen zikri câ’î husûsu mahâllinde lede’l-mu‘âyene keşf ve tahkīk için cânib-i şer‘-i mutahhardan me’zûnen irsâl olunan Kâtib Mehmed Hidâyetullah Efendi dâ‘îleri [ve] hâssa mi‘mârı hulefâsından Mehmed Tahir ve Abdurrahman Halîfeler ile İstanbul’da Çarşı-yı Kebîr’de Yağlıkçılar caddesinden Sahhâflara giden sol tarafda Üç Musluklarnâm mahâlde köşe başında vâki‘ bir bâb haffâf dükkânına varıp cerîdede mazbûtü’l-esâmî Müslimîn huzûrlarında akd-i meclis-i şer‘-i âlî ettikde dükkân-ı mezkûrun gediğine mâlik olan sahib-i arzuhâl el-Hâc Ahmed Ağa b. Abdullah nâm kimesne meclis-i ma‘kūd-ı mezkûrda mârrü’z-zikr dükkân ile bir dükkân aşırı bir bâb çitçi dükkânının kezâlik gediğine mâlik olan derûn-ı arzuhâlde mezkûru’l-ism Sirkeci İbrahim Ağa b. Abdullah nâm kimesne mahzarında dükkân-ı mezkûr bundan akdem vukū‘ bulan harîkde muhterik olup mezbûr İbrahim Ağa’nın kemeri ile benim dükkânımın kemeri bir olup bu esnâda zikrolunan kemerin köşesinde olan taş direği merkūm İbrahim Ağa’nın bi-şartı’r-rücû‘ emriyle mâlımdan müceddeden binâsına dört yüz altmış altı guruş harc ve sarf etmemle masrûfumun nısfı olup bi’l-mürâca‘a hakkım olan iki yüz otuz üç guruşu mezbûr İbrahim Ağa’dan taleb ederim deyü tesâddî eylediğim da‘vâmdan bâ-tavassut-ı muslihîn merkūm İbrahim Ağa ile bi’t-tav‘ ve’r-rızâ yüz elli beş guruş bedel-i medfû‘ ve makbûza ba‘de akdi’l-musâlaha ve’l-kabûl mâ‘adâsı olan yetmiş sekiz guruşa ve bi’l-cümle husûs-ı mezkûra müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve ıskāt eyledik deyü ikrâr ve tasdîklerini kâtib-i mezbûr mahâllinde ketb ve tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği İstanbul Mahkemesi’nden huzûr-ı âlîlerine i‘lâm olundu. Fî 17 Ş sene 1242