İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 393 Hüküm no: 343 Orijinal metin no: [65a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyhferhad mahallesi ahalisinin, yanan bakkal dükkânını tekrar inşası sırasında yola çıkma yapan Eftad v. Luka’yı şikâyetleri Bakkal dükkânı keşfi Ma‘rûz Sâdır olan fermân-ı âlîlerine imtisâlen zikri câ’î husûsu mahâllinde lede’l-mu‘âyene keşf ve tahkīk için savb-ı şer‘-i enverden me’zûnen irsâl olunan Kâtib es-Seyyid Ahmed Efendi dâ‘îleri [ve] hâssa mi‘mârı hulefâsından Derviş Ali ve Seyyid Mustafa Halîfeler ile nezâret-i dâ‘îlerinde olan evkāfdan Kuds-i şerîfde vâki‘ Marikob Manastırı fukarâsı ta‘âmiyelerine meşrûta vakıf müsakkafâtından İstanbul’da Kumkapı dâhilinde Şeyhferhad mahallesinde Cüce Çeşmesi civârında köşe başında vâki‘ Çavuşbaşı dükkânı demekle ma‘rûf ma‘lûmü’l-hudûd ve henüz binâsına şürû‘ olunan bir bâb bakkāl dükkânına varıp huzûr-ı Müslimînde akd-i meclis-i şer‘-i âlî ettikde mahalle-i mezbûre re‘âyâsından ashâb-ı arzuhâl Papas Serkiz v. Zakar ve Canik v. Kozmoz ve Nişan v. Sahak ve Mardiros v. Narin nâm zimmîler meclis-i ma‘kūd-ı mezkûrda dükkân-ı mezkûra şehriye yirmi akçe icâre-i müeccele ile bâ-temessük-i mütevellî bi’l-icâreteyn mustasarrıf olan derûn-ı arzuhâlde mastûrü’l-ism Bakkal Eftad v. Luka nâm zimmî muvâcehesinde vakf-ı mezbûr mütevellîsi Zakar v. İstefan zimmî tarafından mürsel vekîl-i şer‘îsi câbî-i vakf Avadis v. Agop zimmî hazır olduğu hâlde işbu derûnunda akd-i meclis-i şer‘-i âlî olunan dükkân-ı mezkûr bundan akdem vukū‘ bulan harîkde muhterik oldukda mersûm Eftad zimmî bu esnâda arsasına ke’l-evvel bakkāl dükkânı binâ etmiş ise de dükkân-ı mezkûr köşesinde Kumkapı’ya giden tarîk-ı âmdan arzan altı parmak mahalli fuzûlî dükkân-ı mezkûra ilâve ve ol vechile tarîk-ı âmmı tazyîk etmekle mürûr ve ubûr edenlere mazarrâtı derkâr ve ma‘azallahu te‘âlâ harîk zuhûrunda cemî‘ ahâlîye meşakkat-i azîmeyi mûcib olacağı bedîhî ve âşikâr olmağla mahâll-i mezkûrdan keff-i yed ve ke’l-evvel tarîk-ı âm olmak üzre terke mersûm Eftad zimmîye tenbîh olunmak matlûbumuzdur deyü da‘vâya tesâddî etmişdik el-hâletü hâzihî mersûm Eftad zimmî rızâsıyla zikrolunan altı parmak mahalli üzerinden binâsını geri çekip keff-i yed ve ke’l-evvel tarîk-ı âm olmak üzre terke ta‘ahhüd eylediğinde biz dahi bu husûsa olacak mesârifine medâr için mâlımızdan mersûm Eftad zimmîye teberru‘an yüz elli guruş def‘ ü teslîm ve umûruna sarfla istihlâke emreylediğimizde ol dahi ahz ü kabz ve emrimiz üzre istihlâk etmekle meblağ-ı müstehlek-i mezkûrun istirdâdına müte‘allika da‘vâdan mersûm Eftad zimmînin zimmetini kabûlü hâvî ibrâ ve ıskāt eyledik dediklerini mersûm Eftad zimmî tasdîk eylediğini kâtib-i mezbûr mahâllinde ketb ve tahrîr ve ma‘an meb‘ûs ümenâ-i şer‘le meclis-i şer‘â gelip alâ-vukū‘ihî inhâ ve takrîr eylediği İstanbul Mahkemesi’nden huzûr. Fî 28 N sene 1242