İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 403 Hüküm no: 350 Orijinal metin no: [67a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabun tüccarından Odunkapılı Marat’ın borçlarının alacaklıları tarafından tecil edilip taksit taksitlendirildiği 26126 guruş tecîl Ma‘rûz Sâdır olan fermân-ı âlîlerine imtisâlen zikri câ’î husûsu ber-nehc-i şer‘î istimâ‘ için savb-ı şer‘-i enverden me’zûnen irsâl olunan Kâtib es-Seyyid Salih Afîf Efendi dâ‘îleri İstanbul Balkapanı’nda kâin nâzır odasına varıp huzûr-ı Müslimînde akd-i meclis-i şer‘-i nebevî ettikde Âsitâne-i aliyyede vâki‘ sabuncu esnâfından Odunkapılı Marat zimmînin dâyinlerinden ve sabun tüccârından olup ma‘lûmü’l-vezn ve’l-fiyât sabun esmânından ba‘de külli’l-hesâb <> gayrı-ez teslîmât sahhu’l-bâkī yüz kırk altı guruş iddi‘â eden Sabun Nâzırı Tiryâkizâde Mehmed Ağa b. Mustafa ve bin yüz altmış iki guruş on sekiz para iddi‘â eden Şahin Ağa b. Hüseyin ve yedi yüz yetmiş dokuz guruş otuz iki para iddi‘â eden -sahh sahh- es-Seyyid el-Hâc Emrullah Ağa b. es-Seyyid İbrahim ve yüz doksan üç guruş iddi‘â eden Salih Efendi b. Hüseyin ve iki yüz doksan üç guruş üç para iddi‘â eden Hüseyin b. Mustafa ve yetmiş iki guruş otuz dört para iddi‘â eden es-Seyyid Mehmed b. Abdullah nâm kimesneler ve bin sekiz yüz guruş iddi‘â eden Vasil v. Yorgi ve iki yüz beş guruş beş para iddi‘â eden Panayot v. Yani ve iki yüz kırk yedi guruş dört para iddi‘â eden Dimitri v. Panayot ve yetmiş altı guruş yirmi beş para iddi‘â eden Sarı Yorgi v. Yani ve yüz yetmiş guruş otuz üç para iddi‘â eden Vasil v. Yorgi ve üç yüz otuz altı guruş yirmi dokuz para iddi‘â eden Manol v. Yorgi ve elli beş guruş iddi‘â eden Toma v. Atam nâm zimmîler ile dükkân kirâsından bâkī altı yüz elli guruş iddi‘â eden sabuncular kethudâsı es-Seyyid İbrahim Ağa b. es-Seyyid Ahmed ve Balkapanı tüccârından olup ma‘lûmü’l-vezn ve’l-fiyât asel ve peynir esmânından kezâlik sahhu’l-bâkī <> yedi bin beş yüz guruş iddi‘â eden es-Seyyid el-Hâc Hasan Ağa b. es-Seyyid Ahmed ve beş yüz guruş iddi‘â eden es-Seyyid el-Hâc İbrahim Ağa b. es-Seyyid Mehmed ve beş bin yedi yüz altmış altı guruş yirmi beş para iddi‘â eden Mehmed Ağa b. Mustafa ve bin yüz doksan iki guruş iddi‘â eden es-Seyyid Mehmed Ağa b. Halil ve yüz yedi guruş iddi‘â eden el-Hâc Mestan Ağa b. Abdullah nâm kimesneler asâleten ve bin dört yüz altmış dokuz guruş dokuz para iddi‘â eden el-Hâc Davud Ağa b. İbrahim’in vekîl-i şer‘îsi Süleyman Ağa b. Mehmed vekâleten ve sekiz yüz otuz dört guruş iddi‘â eden Mustafa Ağa b. Memiş kendi nefsinden asâleten ve bin beş yüz elli altı guruş yirmi beş para matlûbu olup bundan akdem fevt olan el-Hâc Mustafa Ağa b. Abdullah’ın sagīr oğulları Mehmed ve Ali’nin vasîyy-i mansûbları olmağla vesâyeten Yağkapanı tüccârından olup ma‘lûmü’l-vezn ve’l-fiyât yağ ve bal ve peynir semenlerinden ba‘de külli’l-hesâb sahhu’l-bâkī bin bir guruş iddi‘â eden es-Seyyid Salih Efendi b. es-Seyyid Mehmed ve doksan dört guruş iddi‘â eden Hüseyin b. Abdurrahman ve yüz yetmiş guruş iddi‘â eden es-Seyyid Ahmed b. es-Seyyid Mehmed ve üç yüz guruş iddi‘â eden Hüseyin Yazıcı b. Abdullah ve Odunkapı tüccârından olup ma‘lûmü’l-vezn ve’l-fiyât peynir esmânından ba‘de külli’l-hesâb sahhu’l-bâkī beş yüz elli bir guruş iddi‘â eden Osman Ağa b. Süleyman ve altı yüz guruş iddi‘â eden Mehmed Ağa b. Hüseyin ve beş yüz seksen bir guruş iddi‘â eden el-Hâc Ebûbekir Ağa b. Sunullah ve dokuz yüz elli sekiz guruş on altı para iddi‘â eden Mustafa Ağa b. Osman ve altı yüz on bir guruş iddi‘â eden el-Hâc Ahmed Ağa b. Abdüssamed ve üç yüz yetmiş guruş iddi‘â eden Musa Ağa b. Abdullah ve yüz doksan sekiz buçuk guruş iddi‘â eden es-Seyyid İbrahim Ağa b. Edhem ve dokuz yüz seksen dört guruş on iki para iddi‘â eden Mustafa Yazıcı b. Abdullah ve yüz yirmi üç guruş iddi‘â eden İsmail Ağa b. İbrahim ve bin iki yüz <> on dokuz guruş iddi‘â eden Mustafa Yazıcı b. Abdullah nâm kimesneler evvelen şifâhen sâdır olan fermân-ı âlî-şâna imtisâlen evvelen Çarşamba günü Arz Odası’nda huzûr-ı fâizü’n-nûr-ı vekâlet-penâhîlerinde ve ba‘dehû kâtib-i mûmâ-ileyhin kapan-ı mezkûrda me’zûnen akd eylediği meclis-i şer‘-i münîrde sahib-i arzuhâl mersûm Marat v. Lefter zimmî muvâcehesinde Balkapanı nâzırı es-Seyyid el-Hâc Ahmed Ağa ve Yağkapanı nâzırı Süleyman Ağa ve Odunkapı kethudâsı Hâfız Mehmed Ağa hazır oldukları hâlde her biri bi’l-asâle ve bi’l-vekâle ve bi’l-vesâye takrîr-i kelâm edip ber-vech-i bâlâ mersûm Marat zimmî zimmetinde semen-i bey‘den sahhu’l-bâkī alacak hakkımız olan min-haysü’l-mecmû‘ <> otuz iki bin sekiz yüz yetmiş beş -sahh- hâlen ve def‘aten edâya kudreti olmayıp hapis teklîf olunduğu sûretde dahi i‘tibârına sekte gelerek ahz u i‘tâsına halel geleceği ve bu takdîrce taksîte rabt ile te’diye-i deyn ettirilmek tarafeyn hakkında hayr olacağı zâhir olmağla deyn-i mecmû‘-ı mezkûrun işbu târih-i i‘lâmdan beş seneye kadar bin beşer yüz guruşdan cem‘an yedi bin beş yüz guruşunu ve beşinci sene tamamında dahi sene-i mezbûreden bed’ ile <<üç>> beş seneye kadar beşer bin guruşdan cem‘an <> yirmi beş bin guruşunu ve altıncı <> sene dahi <<üç bin altı yüz yirmi altı>> üç yüz yetmiş beş guruşunu verip biz dahi beher sene aldıkça me’hûzumuzu alacaklarımıza göre beynimizde garâmeten iktisâm ve ol vechile mecmû‘unu târih-i i‘lâmdan dokuz sene hitâmına değin tamamen bize edâ ve îfâ etmek üzre rızâmızla imhâl ve tecîl ve taksît eyledik dediklerinde mersûm Marat zimmî dahi meblağ-ı mecmû‘-ı merkūm <> otuz iki bin sekiz yüz yetmiş beş guruş zimmetinde merkūmûna vech-i meşrûh üzre sahîhan deyni olduğunu ikrâr ve i‘tirâf ve ecl-i mezkûru kabûl ve ber-minvâl-i muharrer müeccelen ve mukāssatan edâ ve îfâya ta‘ahhüd eylediğini kâtib-i merkūm dâ‘îleri mahâllinde ketb ve tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîri tenfîz olunduğu İstanbul Mahkemesi’nden huzûr. Fîgurreti Ş sene 1242 İşbu i‘lâmın gerek erkām ve gerek sâir mahallerinde olan tashîhi vâki‘dir. Abdurrahman