İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 405 Hüküm no: 351 Orijinal metin no: [67a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Feyzullah ile Halil b. Mehmed’in ev hissesi intikali niza’ından 100 guruşa sulh olduğu Nısf menzil nizâ‘ından 100 guruş teberru‘an teslîm ile ibrâ Ma‘rûz Sahib-i arzuhâl kiras çubuğu i‘mâl eden esnâfdan Ali b. Feyzullah meclis-i şer‘-i münîrde li-ebeveyn hâletesi oğlu derûn-ı arzuhâlde mezkûru’l-ism Halil b. Mehmed muvâcehesinde İstanbul kādıları fazîletlü efendiler hazerâtı nezâretlerinde âsûde evkāfdan Buğdaycı Mehmed Efendi Vakfı’nın mütevellîsi Mehmed Şâkir Efendi b. el-Hâc Abdullah hazır olduğu hâlde vakf-ı mezkûr müsakkafâtından İstanbul’da Eğrikapı dâhilinde el-Hâc İlyas mahallesinde vâki‘ ma‘lûmü’l-hudûd ve’l-müştemilât beher şehr otuz akçe icâre-i müecceleli bir bâb menzil bundan akdem müte‘âkiben vefât eden min-kıbeli’l-üm ceddim Mustafa b. Mehmed ve zevcesi Âişe Hatun bt. Hasan’ın ile’l-vefât bi’l-icâreteyn münâsafeten taht-ı tasarruflarında iken ceddim mezbûr Mustafa fevt oldukda nısf menzil-i mezkûr sulbiye kızları vâlidem Sâliha ve mezbûr Halil’in vâlidesi Nefise Hatunlara hasbe’l-âde intikāl edip ba‘dehû vâlidem mezbûre Sâliha Hatun dahi menzil-i mezkûrdan intikālen mutasarrıfe olduğu rubu‘ hisse-i şâyi‘asını ve ceddem mezbûre Âişe Hatun dahi mutasarrıfe olduğu nısf hisse-i şâyi‘asını bin iki yüz on sekiz senesi Rebî‘ülevvelinin on yedinci günü bâ-ma‘rifet-i mütevellî mezbûre Nefise Hatun’a her biri ferâğ ve tefvîz ol dahi tefevvüz ve kabûl edip ol vechile mezbûre Nefise Hatun mecmû‘-ı menzil-i mezkûra mutasarrıfe oldukdan sonra iki yüz kırk senesi Cumâdelâhiresinin on beşinci günü menzil-i mezkûru mezbûr Halil’e bâ-ma‘rifet-i mütevellî ferâğ ve tefvîz ol dahi tefevvüz ve kabûl etmişdi lâkin ben ve li-ebeveyn er karındaşım hazır bi’l-meclis Kadri ferâğ-ı mezbûru inkâr ile menzil-i mezkûru mukaddemâ ceddimiz mezbûr Mustafa ve ceddemiz mezbûre Âişe Hatun’un iştirâken tasarruflarında olup ba‘de vefâtihâ nısfı bizim vâlidemiz Sâliha ve nısf-ı âharı mezbûr Halil’in vâlidesi mezbûre Nefise Hatun’a intikāl ve vâlidemiz mezbûre dahi fevt olup [67b] nısf menzil-i mezkûr benimle karındaşım hâzır-ı mezbûra intikāl eder deyü tesâddî eylediğimiz da‘vâmızdan bâ-vesâtat-ı muslihîn fâriğler olduğumuzda ol dahi bizim fakr-ı hâlimize binâen mâlından bize teberru‘an yüz guruş def‘ ü teslîm eylediğinde biz dahi ahz ü kabz edip husûs-ı mezkûra ve bi’l-cümle hukūk-ı sâire-i şer‘iyeye müte‘allika âmme-i da‘vâdan ben ve karındaşım mezbûr Kadri’den her birimiz mezbûr Halil’in zimmetini ol dahi kezâlik husûs-ı mezkûra ve hukūk-ı sâire-i şer‘iyeye ve bize medfû‘u olan meblağ-ı merkūm yüz guruşun istirdâdına müte‘allika mutlaka âmme-i da‘vâdan bizim zimmetimizi ibrâ-i âmm-ı sahîh-i şer‘î <> ve ıskāt-ı tâmm-ı sarîh-i mer‘î ile her birimiz ibrâ ve ıskāt ve her birimiz ber-vech-i muharrer âharın ibrâsını kabûl eyledik deyü ikrâr ve tasdîkleri İstanbul Mahkemesi’nden huzûr. Fî 5 Ş sene 1242 Nüshateyn