İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 409 Hüküm no: 355 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirkor v. Mircan’ın veresesinin, Hasan Ağa b. İsmail’den 7440 guruş alacak davalarını ispat edemedikleri 7440 guruş men‘ Ma‘rûz Habbâz esnâfından olup İstanbul’da Balat kurbünde Ali Paşa-yı Atîk mahallesinde mütemekkin iken bin iki yüz otuz dört senesi Zilka‘detü’ş-şerîfesinin yedinci günü hâlik olan nizâm ustası Tahte’l-kal‘alı [Tahtakaleli] Kirkor v. Mirican zimmînin verâseti zevce-i metrûkesi Deruhi bt. Anderyas ve anası Anna bt. Magsis Nasrâniyeler ile sulbî kebîr oğlu Mircan zimmî ve sagīr oğlu Mıgırdıç ve sulbiye sagīre kızları Anna ve sagīre Maryem’e münhasıra ba‘dehû ümm-i mersûme Anna Nasrâniye dahi hâlike olup verâseti oğlunun oğulları ve kızları mersûmûn Mirican zimmî ve sıgār Mıgırdıç ve Anna ve Maryem’e ba‘de’l-inhisâr mersûme Maryem’in li-ebeveyn er karındaşı ve min-kıbeli’ş-şer‘ vasîyy-i mansûbu arzuhâl eden ibn-i mersûm Mirican zimmî sagīrân-ı mersûmân Mıgırdıç ve Anna’nın anaları ve min-kıbeli’ş-şer‘ kezâlik vasîyy-i mansûbeleri zevce-i mesfûre Deruhi Nasrâniye hâzıra olduğu hâlde İstanbul Mahkemesi’nde meclis-i şer‘-i münîrde derûn-ı arzuhâlde mezkûru’l-ism sâbık habbâzân kethudâsı el-Hâc Hasan Ağa b. İsmail nâm kimesne mahzarında mezbûr el-Hâc Hasan Ağa hâlik-i mesfûrun sağlığında mâlından bi’d-defa‘ât ahz ü kabz ve umûruna sarfla istihlâk eylediği bâ-defter-i müfredât sekiz bin dört yüz kırk guruş mezbûr el-Hâc Hasan Ağa zimmetinde alacak hakkı olup hatta mezbûr el-Hâc Hasan Ağa’dan meblağ-ı merkūmu taleb eylediğinde ol dahi deyni olduğunu ikrâr ve meblağ-ı mezkûrun <> bin guruşunu iki def‘ada hâlik-i mesfûra teslîm etmekle bâkīsi olan yedi bin dört yüz kırk guruşu kable’l-ahz ve’l-istifâ hâlik ve meblağ-ı merkūm ber-mûcib-i münâsaha-i mezkûre bizimle sıgār-ı mersûmûna mevrûs olmağla meblağ-ı bâkī-i merkūm yedi bin dört yüz kırk guruşu mezbûr el-Hâc Hasan Ağa’dan bi’l-verâse ve bi’l-vekâle taleb ederiz deyü hâzıra-i mersûme ile da‘vâ ettiklerinde ol dahi cevâbında külliyen inkâr etmekle müdde‘iyân-ı mersûmân Mirican zimmî ve Deruhi Nasrâniye ber-vech-i muharrer müdde‘âlarını isbâtdan acz-birle istihlâf ettiklerinde mezbûr el-Hâc Hasan Ağa’ya vech-i şer‘î üzre yemîn verilmeğin mûcibiyle müdde‘iyân-ı mersûmân da‘vâ-yı mezkûreleriyle mezbûr el-Hâc Hasan Ağa’ya bilâ-beyyine mu‘ârazadan men‘ olunduğu huzûr. Fî 23 Şa‘bân sene 1242