İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 408 Hüküm no: 354 Orijinal metin no: [67b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci Agop v. Mardıros ile Çedikçi Halil Ağa’nın vereselerinin ev intikalinden 1000 guruşa sulh oldukları 1500 guruş ibrâ ve 1000 guruş ahz ü kabz ve menzil intikāli evlâdına Ma‘rûz Mübârek-rikâb-ı kamer-tâb-ı husrevâneye takdîm-i arzuhâl eden mu‘arrefetü’ş-şahs Turfanda bt. Agop Nasrâniyenin zevci olup bundan akdem hâlik olan Keresteci Agop v. Mardiros zimmînin verâseti zevce-i metrûkesi mersûme Turfanda Nasrâniye ile sulbî kebîr oğlu Kirkor ve sulbiye kebîre kızı Maryam Nasrâniye ve sagīre kızı Noyne’ye inhisârı tahakkukundan sonra verese-i mersûmûndan mersûm Kirkor zimmî evvelen Çarşamba günü Arz Odası’nda huzûr-ı hazret-i sadâret-penâhîde ve ba‘dehû bi’t-terâzî du‘âhâne-i dâ‘îlerinde ma‘kūd meclis-i şer‘-i enverde sagīre-i mersûmenin anası ve min-kıbeli’ş-şer‘ vasîyy-i mansûbesi mesfûre Turfanda ile mersûme Maryam Nasrâniyeler hâzıra oldukları hâlde Çedikçi el-Hâc Halil Ağa nâm kimesne muvâcehesinde hazır bi’l-meclis es-Seyyid Ahmed Efendi b. es-Seyyid İbrahim’in mütevellîsi olup nezâret-i dâ‘iyânemde olan evkāfdan merhûm Şücâeddin Yusuf Anbarî Vakfı müsakkafâtından mahrûse-i Galata hâricinde Beyoğlu nâm mahâlde Santa Marika mahallesinde vâki‘ hâmiş-i arzuhâlde ihrâc olunan defter-i vakf kaydında muharrer olduğu üzre beher şehr on akçe icâre-i müecceleli hâlik-i mersûm sağlığında bâ-temessük-i mütevellî bi’l-icâreteyn müstakillen mutasarrıf olduğu ma‘lûmü’l-hudûd bir bâb menzil-i müfrez-i sagīri hâlik-i mesfûr merkūm Halil Ağa’nın pederi İbrahim Ağa b. Ahmed’in mâlından ve yedinden iktirâz ve kabz eylediği iki bin beş yüz guruş deyni mukābelesinde vefâen bâ-re’y-i mütevellî merkūm İbrahim Ağa’ya ferâğ ve tefvîz ettikden sonra evvelen babam mersûm Agop zimmî deyni olan meblağ-ı mezkûr iki bin beş yüz guruşu edâ ile menzil-i mezkûr geri red ve ferâğ olunmaksızın hâlik ve ba‘dehû mezbûr İbrahim Ağa verâseti ancak sulbî oğlu merkūm el-Hâc Halil Ağa’ya münhasıra olduğu hâlde fevt olup lâkin babam hâlik-i mersûmun deyn-i mezkûrunu edâya asla terekesi nâmına nesnesi olmadığından mezbûr el-Hâc Halil Ağa bi’l-verâse alacağı olan meblağ-ı mezkûr iki bin beş yüz guruşun bin beş yüz guruşunu rızâsıyla hat ve tenzîl ve bâkīsi olan bin guruşu ben mâlımdan teberru‘an mezbûr el-Hâc Halil Ağa’ya def‘ ü teslîm ol dahi ba‘de’l-ahz mütevellî-i hâzır-ı merkūm dahi menzil-i mezkûru babamız hâlik-i mesfûrun âdiyen intikālinden benimle kız karındaşlarım hâzıra-i mersûme Maryam Nasrâniye ile sagīre Noyne’nin eslâsen tasarrufumuza ba‘de’l-izn bi’l-cümle bundan akdem menzil-i mezkûrun şart-ı mezbûr ile ferâğına dâir ve sâir beynimizde cereyân eden cemî‘ hukūk-ı şer‘iyeye müte‘allika âmme-i da‘vâdan benimle anam ve kız karındaşım hâzıretân-ı mersûmetândan her birimiz ancak [68a] bi’l-asâle mezbûr el-Hâc Halil Ağa’nın zimmetini ol dahi hat ve tenzîl eylediği meblağ-ı mezkûr bin beş yüz guruşa ve ferâğ-ı mezkûrda kat‘î müdde‘âsına ve bi’l-cümle husûs-ı mezkûra müte‘allika âmme-i da‘vâdan benimle anam ve kız karındaşım hâzıretân-ı mesfûretânın zimmetlerimizi her birimiz ibrâ-i âmm-ı sahîh-i şer‘î ile ibrâ ve ıskāt ve her birimiz ber-vech-i muharrer bi’l-asâle âharın ibrâsını kabûl eyledik deyü bi’l-cümle takrîrini mezbûr el-Hâc Halil Ağa ile mütevellî-i hâzır-ı merkūm es-Seyyid Ahmed Efendi ve hâzıretân-ı mersûmetân Turfanda ve Maryam Nasrâniyelerden her biri tasdîk edip bu vechile kat‘-ı münâza‘a eyledikleri İstanbul Mahkemesi’nden huzûr. Fî 25 Ş sene 1242 Nüshateyn