İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 435 Hüküm no: 380 Orijinal metin no: [72b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman b. Mahmud’un, mahalle imamını şikâyetinin geçersizliği Aydın Kethudâ mahallesi imâmından ta‘zîr men‘i Ma‘rûz Topçu neferâtından arzuhâl eden Süleyman b. Mahmud nâm kimesne meclis-i şer‘-i münîrde İstanbul’da Yayla kurbünde Aydın Kethudâ mahallesi imâmı Hâfız Mehmed Rızâ Efendi b. el-Hâc Mehmed Zahid nâm kimesne muvâcehesinde ben bundan akdemce âhar mahallede tezevvüc eylediğim hatunu mahalle-i mezbûrede istîcâr eylediğim menzile nakl ile zifâf gecesi li-ecli’d-du‘â imâm-ı mezbûru da‘vet eylediğimde güveği yeni tımarhâneden çıkmadır gece hatunun boğazını sıkar ise sonra biz sıkıntı çekeriz deyip du‘âya gelmemekle imâm-ı mezbûra ta‘zîr olunmak matlûbumdur deyü takrîr-i meşrûhu üzre tesâddî eylediği da‘vâsı bu mertebe ile iltifâta şâyân olmadığı kendüye tefhîm ve da‘vâ-yı mezkûresiyle imâm-ı mezbûra bî-vech-i şer‘î mu‘ârazadan men‘ olunduğu İstanbul Mahkemesi’nden huzûr. Fî 9 min-Za sene 1242