İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 434 Hüküm no: 379 Orijinal metin no: [72b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Artin v. Serope’nin, hapsedilmesinin meşru olmadığı İflâs hükmü Ma‘rûz Selefim fazîletlü el-Hâc Mehmed Sâdık Efendi dâ‘îlerinin mührünü hâvî sene-i sâbıkā Recebi’l-ferdinin beşinci günü târihiyle müverrah der-dest olan i‘lâm-ı şer‘îleri mantûkunca İngilterelü Tomazoriço v. Noviço ile Esper ve Aci v. Nikola nâm müste’menlere on bin sekiz yüz doksan dokuz guruş deyni için müddet-i medîdeden beri mahpus [mahbûs] olan sahib-i arzuhâl Dellâl Uncu oğlu Artin v. Serope nâm zimmî Çarşamba günü Arz Odası’nda huzûr-ı hazret-i sadâret-penâhîlerinde ma‘kūd meclis-i şer‘-i münîrde dâyinân-ı müste’menân-ı mersûmân muvâcehelerinde tercümanı Federiko hazır olduğu hâlde çend sene mukaddem mahrûse-i Galata’da vukū‘ bulan harîkde mecmû‘-ı mâlım muhterik olmak takrîri ben fakīr ve mu‘assir olup lâbis olduğum müsta‘mel libâsımdan gayrı ism-i mâl ıtlâk olunur nesnem olmamağla sebîlim tahliye olunmak matlûbumdur deyü ısrarını iddi‘â ve dâyinân-ı mesfûrân medyûn-ı mersûmun yesârını isbâta kādirler olmamağla mahpus-ı [mahbûs-ı] mersûm ber-vech-i muharrer ısâr müdde‘âsını lede’t-tezkiye makbûlü’ş-şehâde idükleri ihbâr olunan kalpakçılar kâhyası Mıgırdıç v. Artin ve Haffâf Abraham v. Kalos nâm zimmîler şehâdetleriyle dâyinân-ı mersûmân Tomazoriço ve Esper ve Aci muvâcehelerinde ber-nehc-i şer‘î isbât etmeğin mûcibince medyûn-ı mersûm Artin zimmînin yesârı sâbit olmadıkça hapsi meşrû‘ olmayıp hapisden ıtlâk olunmak lâzım geldiği İstanbul Mahkemesi’nden huzûr. Fî 10 min-Za sene 1242