İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 450 Hüküm no: 398 Orijinal metin no: [75a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Yazıcı b. Mustafa’nın, alacaklısı Hatibzâde Hasan Ağa ile 3000 guruşa sulh olduğu 3000 guruşa sulh Ma‘rûz Sahib-i arzuhâl Çilingir oğlu Ahmed Yazıcı b. Mustafa bi’t-terâzî dâ‘îhânelerinde ma‘kūd meclis-i şer‘-i münîrde Kapan-ı dakīk tüccârından derûn-ı arzuhâlde mezkûru’l-ism Hatîbzâde el-Hâc Hasan Ağa b. Mehmed muvâcehesinde ben mezbûr el-Hâc Hasan Ağa’nın yazıcısı ta‘bîr olunur umûr-ı ticâretde vekîli olmamla işbu der-dest olup meclis-i şer‘de kırâet olunan müfredât defterinde madde-be-madde tasrîh olunduğu üzre bin iki yüz otuz dokuz senesi şehr-i Rebî‘ülâhirinin yirmi birinci gününden kırk senesi gāyetine gelince İbrail ve Kalas İskelelerinden bi’l-iştirâk kendüye irsâl eylediğim zehâir-i mütenevvi‘a ve mezbûrun gerek surre ta‘bîr olunur nakden bana gönderdiği ve gerek benim poliçe tarîkiyle havâle eylediğim mebâliğ-i ma‘lûme ve ber-vech-i mukāvele ücretim ve sâir makbûzât ve masrûfâtımızın hesâbını bu def‘a kapan tüccârı ma‘rifetleriyle tarafeynin defterlerine tatbîkan yegān yegān [75b] sahîhan rü’yet eylediğimizde benim merkūm el-Hâc Hasan Ağa zimmetinde sahhu’l-bâkī dört bin dokuz yüz kırk bir guruş alacak hakkım zuhûr etmekle meblağ-ı bâkī-i mezkûr dört bin dokuz yüz kırk bir guruşu mezbûr el-Hâc Hasan Ağa’dan hâlen taleb ederim deyü tesâddî eylediğim da‘vâmdan bâ-tavassut-ı muslihîn mezbûr el-Hâc Hasan Ağa ile bi’t-tav‘ ve’r-rızâ üç bin guruş üzerine sulh olduğumda ol dahi sulh-ı mezkûru ba‘de’l-kabûl bedel-i sulh-ı merkūm üç bin guruşdan mâ‘adâ bi’l-cümle husûs-ı mezkûra ve sâir beynimizde cereyân eden cemî‘ ahz ü i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve ıskāt eyledik deyü takrîrini mezbûr el-Hâc Hasan Ağa tasdîk etmeğin bu sûretde bedel-i sulh-ı mezkûr üç bin guruşun bi’t-taleb müdde‘î-i mezbûr Ahmed Yazıcı’ya edâsıyla merkūm el-Hâc Hasan Ağa ilzâm olunduğu İstanbul Mahkemesi’nden huzûr. Fî 10 min-Za sene 1242