İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 451 Hüküm no: 399 Orijinal metin no: [75b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çatal Han’daki ipek bükücü hanelerin yarı kârgir değil tam kârgir olarak inşa edilmesi gerektiği Çatal Han derûnunda ipek bükücü hâneler nîm kârgir olarak inşâsı istid‘âları Ma‘rûz Sâdır olan fermân-ı âlîlerine imtisâlen evvel-emirde işbu arzuhâl ve hâssa mi‘mârı ağa kullarının i‘lâmına nazar olundukda Dârü’s-sa‘âdeti’ş-şerîfe ağası hazretleri nezâret-i aliyyelerinde âsûde <> Ayasofya-i Kebîr Vakfı müstagallâtından İstanbul’da Sultân Bâyezid-i Velî Han Hazretleri Câmi‘-i şerîfi kurbünde Okçular verâsında kâin Çatal Han derûnunda vâki‘ dört bâb ipek bükücü hâneler bundan akdem muhterik olup bu def‘a aslı üzre inşâ murâd eylediklerinde kârgir olmak muktezâ-yı irâde-i seniyyedendir deyü ahşab binâsından me’mûrîn men‘ eyledikleri beyânıyla bütün kârgir inşâsına dahi kudretleri olmadığından nîm kârgir inşâsına -sahh sahh sahh- ruhsat-ı seniyyeleri erzânî buyurulmasını mutasarrıfları istirhâm eyledikleri mefhûm-ı arzuhâlden müstebân ve bu makūle hân ta‘bîr olunan mahaller tâm kârgir yapılmak ebniye hakkında bâ-irâde-i seniyye karâr-gîr olan nizâm-ı müstahsene iktizâsından idüğü meâl-i i‘lâmdan müstefâd ve nümâyân oldukdan sonra mahâllinde bi’l-mu‘âyene keşf ve tahkīk için taraf-ı dâ‘iyânemden irsâl olunan Kâtib es-Seyyid Ahmed Efendi dâ‘îleri bi’l-ma‘iyye rü’yete me’mûr Haremeyn-i şerîfeyn müfettişi olup İstanbul pâyesiyle tekrîm buyrulan Emin Beyefendi-zâde fazîletlü Abdülkadir Beyefendi tarafından mürsel Kâtib Mehmed Hamdi Efendi ve mi‘mâr-ı mûmâ-ileyh tarafından mürsel Selim Sâbit ve Abdülaziz Halîfeler ile hân-ı mezkûra varıp vakf-ı mezbûr mütevellîsi kâtib-i ağa-yı müşârün-ileyh Ahmed Reşid Efendi tarafından mürsel câbî-i vakf es-Seyyid İbrahim Efendi hazır olduğu hâlde lede’l-keşf ve’l-mu‘âyene mi‘mârân-ı mezbûrânın tersîm eyledikleri kâğıdda işâret olunduğu vechile tahte’l-arz hafr-i esâsla sakfa müsâvî oluncaya kadar temelleri beyâz taş molozundan melez harçla taş dîvâr ve iktizâsı üzre gizli sütun ve pâyandalı bi’l-esâs mîşeden [meşeden] gizli çenber tabanlı ve dolabdan mikrâslı omurgadan kuşaklı yandan payanda ve göğüslemeli bi’l-cümle eğrice kanadlığından kablı kiremid tahtı hâlis harçla sıvalı satranç harçla mahyalı ve etrâfı muhkem derzli ve her bir edevât-ı lâzımesi kârgir şeklinde olarak inşâya ruhsat verilmesini mutasarrıfları Mehmed Ağa ve Mustafa Ağa ve İbrahim Ağa kulları istirhâm ve istid‘â ve ber-vech-i tafsîl inşâsı istid‘â olunan sûret benim kârgir ta‘bîr olunan şekl olup bu vechile inşâ olunduğu hâlde istihkâm kesb ederek mehmâ-emken hatardan masûn olacağını mi‘mârân-ı mezbûrân inhâ eylediklerini mevlânâ-yı mûmâ-ileyhimâ dâ‘îleri mahâllinde ketb ve tahrîr ve ma‘an meb‘ûs ümenâ-i şer‘le meclis-i şer‘a gelip ashâb-ı arzuhâl ve mi‘mârân ve mütevellî-i merkūmûn hazır oldukları hâlde resm-i mezkûru irâe ve ta‘rîf ile takrîr eyledikleri ma‘lûm-ı ilm-i âlem-ârâları buyruldukda istid‘âlarına müsâ‘ade husûsu ancak re’y-i rezîn-i isâbet-karîn-i âsafânelerine menût idüğü İstanbul Mahkemesi’nden huzûr. Fî 19 min-Za sene 1242