İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 459 Hüküm no: 406 Orijinal metin no: [77a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa b. Mustafa’nın, Şekerci Selim Ağa ve kefili Mustafa Ağa ile 300 guruşa sulh olduğu 300 guruşa kefâlet sulhü Şekerci esnâfından derûn-ı arzuhâlde mezkûru’l-ism es-Seyyid Hasan Ağa b. Mustafa nâm kimesne meclis-i şer‘-i münîrde esnâf-ı merkūmeden sahib-i arzuhâl Mustafa Ağa b. Hüseyin nâm kimesne muvâcehesinde benim işbu hazır bi’l-meclis Şekerci Selim Ağa b. Hasan nâm kimesne zimmetinde bin iki yüz kırk senesi Zilka‘detü’ş-şerîfesinin beşinci günü târihiyle müverrah bir kıt‘a temessük mantûkunca yedimden ve mâlımdan iktirâz ve kabz eylediği sekiz yüz guruş alacak hakkımın ancak iki yüz guruşunu rızâmla hat ve tenzîl ve mutâlebesine müte‘allika da‘vâdan mezbûrun zimmetini kabûlü hâvî ibrâ ve ıskāt etmemizle bâkīsi olan altı yüz guruşa mezbûr Mustafa Ağa işbu sene-i mübâreke şehr-i Rebî‘ülevvelinin yirmi beşinci günü tarafeynden bi’l-emr ve’l-kabûl kefâlet-i mutlaka-i sahîha-i şer‘iye ile kefîl ve zâmin olup lâkin ben bu def‘a asîl-i hâzır-ı merkūm Selim Ağa zimmetinde meblağ-ı bâkī-i mezkûr altı yüz guruş alacak hakkım olduğunu lede’t-tezkiye adl ve makbûlü’ş-şehâde idükleri ihbâr olunan Ketâncılarbaşında Şekerci Ahmed Ağa b. İsmail ve Bağçekapısı’nda Hasan Ağa b. Ali nâm kimesneler şehâdetleriyle bi’l-muvâcehe vech-i şer‘î üzre ba‘de’l-isbât hâzır-ı asîl-i merkūm dahi meblağ-ı bâkī-i mezkûr zimmetinde bana sahîhan deyni olduğunu ve kefîl-i merkūm dahi ber-vech-i muharrer kefâletini tâyi‘an ve kat‘iyen ikrâr ve i‘tirâf etmeleriyle ol vechile meblağ-ı bâkī-i mekfûlün-bih-i mezkûr altı yüz guruşu kefîl-i mezbûr Mustafa Ağa’dan hâlâ taleb ederim deyü tesâddî eylediğim da‘vâmdan bâ-tavassut-ı muslihîn kefîl-i merkūm Mustafa Ağa ile bi’t-tav‘ ve’r-rızâ üç yüz guruş bedel-i medfû‘ ve makbûza sulh olduğumda ol dahi sulh-ı mezkûru ba‘de’l-kabûl mâ‘adâsı olan üç yüz guruşa ve bi’l-cümle husûs-ı mezkûra müte‘allika da‘vâdan asîl-i hâzır-ı merkūm Selim Ağa ile kefîl-i mezbûr Mustafa Ağa’nın zimmetlerini kabûllerini hâvî ibrâ ve ıskāt eyledim deyü ikrâr ve tesâdukları İstanbul Mahkemesi’nden huzûr. Fî-gurreti min-Za sene 1242