İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 457 Hüküm no: 405 Orijinal metin no: [76b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çolak Artin Kalfa v. Sahak ile Panos v. Serkiz’in, ev inşası ücretinden 850 guruşa sulh oldukları Husûsla menzil binâsı masrûfundan 850 guruşa sulh Ma‘rûz Sâdır olan fermân-ı âlîlerine imtisâlen husûs-ı âti’l-beyânın mahâllinde ketb ü tahrîri’çün kıbel-i şer‘den me’zûnen bi’l-hükm irsâl olunan Kâtib es-Seyyid Ahmed Rıza Efendi dâ‘îleri [ve] hâssa mi‘mârı hulefâsından es-Seyyid Ali Necib ve es-Seyyid İsmail Zühdü Halîfeler ile İstanbul’da Langa Yenikapısı kurbünde Musallâ nâm mahâlde vâki‘ ma‘lûmü’l-hudûd bir bâb menzile varıp Harîrî Fehmizâde el-Hâc Mehmed Ağa b. Osman ve ebniye nizâmına me’mûr el-Hâc Mehmed Ağa b. Yusuf nâm kimesneler ile neccâr kalfalarının ehl-i vukūfundan İstanbul yiğitbaşısı Kosti v. Dimitri ve Söğüdlü Anaştaş Kalfa v. Kostandi ve menzil-i mezkûr civârında sâkinler Kapamacı Sakā oğlu Artin v. Toma ve Hekîm Oseb v. Agop ve Berber Bogos v. Melkon zimmîler ve sâirleri hazır oldukları hâlde akd-i meclis-i şer‘-i âlî ettikde neccâr kalfalarının perâkende kolu neferâtından sahib-i arzuhâl Çolak Artin Kalfa v. Sahak zimmî meclis-i ma‘kūd-ı mezkûrda menzil-i mezkûra bâ-temessük-i mütevellî bi’l-icâreteyn müstakillen mutasarrıf olan derûn-ı arzuhâlde mastûrü’l-ism İpekçi Panos v. Serkiz nâm zimmî muvâcehesinde ben bundan akdem mersûm Panos zimmînin bi-şartı’r-rücû‘ emriyle beher zirâ‘ı elli beşer guruşa olarak muhterik arsası üzerine doksan zirâ‘ üç direk müceddeden menzil-i mezkûru binâ ve inşâ ve tekmîl etmişdim lâkin ben mersûm Panos zimmînin ber-vech-i muharrer emriyle menzil-i mezkûra mâlımdan cem‘an sekiz bin guruş sarf etmemle masrûfum <> olup Panos zimmînin zimmetinde bi’l-mürâca‘a alacak hakkım olan meblağ-ı mezkûr sekiz bin guruşun beş bin iki yüz altmış guruşunu zimmî-i mersûm ceste ceste mukaddemâ bana edâ ve teslîm ben dahi yedinden ahz ü kabz ve iki yüz guruşunu dahi zimmî-i mersûmun mâlından olarak menzil-i mezkûra vaz‘ eylediğim atîk ve doğrama ve yetmiş aded ebniye-i câm kıymetleri’çün lede’t-tenzîl bâkīsi olan iki bin beş yüz kırk guruşu mersûm Panos zimmîden hâlâ taleb ederim deyü tesâddî eylediğim da‘vâmdan bâ-tavassut-ı muslihîn mesfûr Panos zimmî ile bi’t-tav‘ ve’r-rızâ sekiz yüz elli guruş üzerine sulh olduğumda ol dahi sulh-ı mezkûru kabûl ve bedel-i sulh-ı merkūm sekiz yüz elli guruşun iki yüz dört guruşunu işbu meclis-i ma‘kūd-ı mezkûrda bana edâ ve teslîm ben dahi yedinden ahz ü kabz etmekle bedel-i sulh-ı mezkûrdan mâ‘adâ meblağ-ı mezkûr iki bin beş yüz kırk guruşa varınca ziyâdesi olan bin altı yüz doksan guruşa ve bi’l-cümle ebniye-i mezkûre husûsuna ve işbu târih-i i‘lâma gelince sâir cemî‘ hukūk-ı şer‘iyeye müte‘allika âmme-i de‘âvî ve kâffe-i mutâlebâtdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve ıskāt ve her birimiz ber-vech-i muharrer âharın ibrâsını kabûl eyledik dediklerini mersûm Panos zimmî tasdîk ve ber-vech-i meşrûh kabûlü hâvî ibrâ eylediğini ve ibrâdan müstesnâ bedel-i sulh-ı mezkûr sekiz yüz elli guruşdan bâkī altı yüz kırk altı guruş zimmetinde müdde‘î-i mersûma sahîhan deyni olduğunu tâyi‘an ve kat‘iyen ikrâr ve i‘tirâf etmeğin alâ-mûcib-i i‘tirâfihî bedel-i sulh-ı mezkûrdan bâkī-i meblağ-ı mezkûr altı yüz kırk altı guruşun müdde‘î-i mersûm Artin zimmîye edâ ve teslîmiyle mesfûr Panos zimmîyi ilzâm eylediğini kâtib-i mezbûr mahâllinde ketb ve tahrîr ve ma‘an meb‘ûs ümenâ-i şer‘den Çukadâr el-Hâc Veliyüddin Ağa b. İbrahim ve Muhzır Yahya Çelebi b. Süleyman ile meclis-i şer‘-i şerîfe gelip alâ-vukū‘ihî inhâ ve takrîri ba‘de’t-tenfîz İstanbul Mahkemesi’nden huzûr. Fî 18 min-Za sene 1242 [Beyaz Beyaz]