İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 460 Hüküm no: 408 Orijinal metin no: [77a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Saide Hanım bt. Mehmed’in, kazzaz gediğini Ohannes v. Serkiz’e sattığı Kazzâz mübâya‘ası Ma‘rûz Zâtı mu‘arrefe Şerife Saide Hanım bt. Mehmed meclis-i şer‘-i münîrde kazzâz esnâfından Ohannes v. Serkiz zimmî muvâcehesinde esnâf-ı merkūme kethudâsı Abdüllatif Ağa tarafından mürsel yiğitbaşı Molla Mehmed hazır olduğu hâlde takrîr-i kelâm edip İstanbul’da Çarşı-yı Kebîr’de Çakır Ağa zukāğı demekle ma‘rûf sûkda Kalpakçılar karşısında Dülbendciler zukāğı başında Yağlıkçılar sûkunda basmacı dükkânına müntehî oluncaya değin vâki‘ zukāk tarafeyninde kâin dekâkînden Yağcı Kigork zimmî dükkânı ittisâlinde kâin bir bâb kazzâz dükkânı derûnunda mevcûde beyne’l-esnâf gedik ta‘bîr olunur bâ-sûret mâlike olduğum âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin mersûm Ohannes zimmîye bin guruş semen-i makbûza bey‘ ve temlîk ü teslîm ol dahi iştirâ ve temellük ü tesellüm ve kabz ü kabûl edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini kabûlü hâvî ibrâ ve ıskāt etmemizle fîmâ-ba‘d âlât-ı gedik-i mezkûr zimmî-i mesfûrun mal-ı müşterâsı ve hakk-ı sırfı olup benim alâkam kalmamışdır deyü ba‘de’l-ikrâr ve’t-tasdîk gedik-i mezkûrun bâyi‘a-i mezbûre Şerife Saide Hatun ismine olan kaydı ref‘ ve terkīn ve atîk sûreti battalda hıfz ile müşteri-i mersûm Ohannes zimmî ismine tashîhan kayd ve yedine müceddeden sûret i‘tâsını istid‘â eyledikleri İstanbul Mahkemesi’nden huzûr. Fî 21 min-Za sene 1242