İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 460 Hüküm no: 409 Orijinal metin no: [77a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Efendi Vakfı’na ait evin Avakim v. Agya’ya intikaline, vakıf mütevellisinin itiraz ettiği Menzil keşfi der-kurb-ı Fethiye Ma‘rûz Sâdır olan fermân-ı âlîlerine imtisâlen zikri âtî husûsun mahâllinde ber-nehc-i şer‘î ketb ü tahrîri’çün cânib-i şer‘-i şerîf-i enverden me’zûnen irsâl olunan Kâtib Hasan Şükrü Efendi dâ‘îleri bi’l-ma‘iyye rü’yete me’mûr Haremeyn-i şerîfeyn müfettişi olup İstanbul pâyesiyle tekrîm buyrulan Emin Beyefendi-zâde fazîletlü Abdülkadir Beyefendi tarafından meb‘ûs Kâtib Mehmed Nizâmeddin Efendi ile Dârü’s-sa‘âdeti’ş-şerîfe ağası hazretleri nezâretlerinde âsûde evkāfdan ashâb-ı hayrâtdan matbah-ı âmire emîni esbak-ı merhûm Süleyman Efendi Vakfı müsakkafâtından İstanbul’da Fethiye kurbünde Tevkī‘î Cafer mahallesinde kâin bir tarafdan Aci Anatran zimmî tasarrufunda olan menzil <> ve bir tarafdan zikri câ’î menzilden müfrez Marye Nasrâniye tasarrufunda olan menzil ve bir tarafdan tarîk-ı âm ve taraf-ı râbi‘i tarîk-ı hâs ile mahdûd bir bâb menzile varıp huzûr-ı Müslimînde akd-i meclis-i şer‘-i âlî ettiklerinde vakf-ı mezbûrun evlâdiyet ve meşrûtiyyet üzre mütevellîsi sahib-i arzuhâl İsmail Ramiz Efendi b. Mehmed Ramiz nâm kimesne kezâlik evlâd-ı vâkıfdan mu‘arrefetü’z-zât Hibetullah bt. Mehmed nâm hatun hâzıra olduğu hâlde meclis-i ma‘kūd-ı mezkûrda terzi esnâfından Avakim v. Agya nâm zimmî muvâcehesinde derûn-ı arzuhâlde mezkûreti’l-ism mu‘arrefetü’ş-şahs Zümrüd bt. Kapril Nasrâniye hâzıra olduğu hâlde menzil-i mahdûd-ı mezkûr kezâlik derûn-ı arzuhâlde mersûmetü’l-ism Elmas bt. Artin Nasrâniyenin zahr-ı arzuhâlde mastûr defter-i vakfdan muhrec derkenâr nâtık olduğu üzre bi’l-icâreteyn müstakilleten taht-ı tasarrufunda iken bundan akdem bilâ-veled hâlike olup menzil-i mahdûd-ı mezkûr mahlûk ve cânib-i vakf-ı şerîf-i merkūma âid ve râci‘ olmuş iken mersûm Avakim zimmî ben hâlike-i mesfûre Elmas Nasrâniyenin sadrî sahîh oğluyum diyerek bir-takrîb beni iğfâl ile hâlike-i mersûmenin intikālinden kendi tasarrufu’çün izin istedikde ben dahi inanıp menzil-i mahdûd-ı mezkûru bin iki yüz otuz dokuz senesi Cumâdelâhiresinde hâlike-i Nasrâniye-i mesfûrenin intikālinden sadrî sahîh oğludur diyerek mersûm Avakim zimmînin tasarrufuna izin ve yedinde olan atîk temessüke şerh-birle defter-i vakf-ı şerîfde uhdesine kaydeylediğimden sonra mersûm Avakim zimmî menzil-i mahdûd-ı mezkûru hâzıra-i mersûme Zümrüd Nasrâniyeye bundan akdemce hüsn-i rızâ ve tayyib-i hâtırıyla [77b] kat‘iyen ferâğ ve tefvîz eylediğinde ol dahi ba‘de’t-tefevvüz ben dahi bi’t-tevliye mersûm Avakim zimmînin ferâğından hâzıra-i mersûme Zümrüd Nasrâniyenin tasarrufuna izin ve müceddeden yedine bir kıt‘a temessük dahi i‘tâ etmişdim lâkin hakīkatde mersûm Avakim zimmî hâlike-i mesfûre Elmas Nasrâniyenin sadrî sahîh oğlu olmayıp bilâ-veled hâlike ve menzil-i mahdûd-ı merkūm mahlûl ve cânib-i vakf-ı şerîf-i mezkûra âid olmağla menzil-i mahdûd-ı mezkûru bi’t-tevliye zabtederim dedikde mesfûr Avakim zimmî dahi cevâbında ben hâlike-i mersûme Elmas Nasrâniyenin sadrî sahîh oğlu olup ol vechile mütevellî-i müdde‘î-i mezbûr menzil-i mahdûd-ı mezkûru intikāl-i âdî ile intikālinden benim tasarrufuma ba‘de’l-izn ben dahi vech-i meşrûh üzre hâzıra-i mersûme Zümrüd Nasrâniyeye bedel-i medfû‘ ve makbûz mukābelesinde rızâmla kat‘iyen fâriğ olmuşdum deyü hâzıra-i mersûme Zümrüd Nasrâniyenin tasdîkiyle eylediği müdde‘âsını kâtibân-ı merkūmân mahâllinde ketb ve tahrîr ve ma‘an meb‘ûs ümenâ-i şer‘le meclis-i şer‘-i şerîfe gelip <> tarafeyn bi-ecmâ‘ihim hazır oldukları hâlde tasdîklerine mukārin alâ-vukū‘ihî ba‘de’l-inhâ ve’t-takrîr mesfûr Avakim zimmî ber-vech-i muharrer hâlike-i mersûme Elmas Nasrâniyenin sadrî sahîh oğlu olduğunu udûlden Çukadâr Selim Ağa b. Osman ve Fenerkapısı dâhilinde Cafer Subaşı mahallesi ahâlîsinden Dikici es-Seyyid İbrahim Ağa b. Ali Reis ve Mültezim Ahmed Ağa’nın yanında sâkin Abdurrahman Ağa b. el-Hâc İbrahim nâm kimesneler şehâdetleriyle bi’l-muvâcehe vech-i şer‘î üzre isbât etmeğin mûcibince menzil-i mahdûd-ı mezkûr ber-minvâl-i muharrer hâlike-i mersûme Elmas Nasrâniyenin intikālinden ve ba‘dehû mesfûr Avakim zimmînin ferâğından el-yevm hâzıra-i mersûme Zümrüd Nasrâniyenin zabt ve tasarrufu iktizâ eylediği müdde‘î-i mütevellî-i merkūma tefhîm ve da‘vâ-yı mezkûresiyle mersûm Avakim zimmî ile hâzıra-i mesfûre Zümrüd Nasrâniyeye bî-vech-i şer‘î mu‘ârazadan men‘ olundukları İstanbul Mahkemesi’nden huzûr-ı âlîlerine i‘lâm olundu. Fî 19 min-Za sene 1242