İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 469 Hüküm no: 418 Orijinal metin no: [79a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhume Ümmühani bt. Süleyman’ın kasap gediği hissesinin, vakfı tarafından Ali b. Osman’a kiralandığı Taraf-ı vakıfdan kasab gediği îcârı Ma‘rûz Kasab esnâfından el-Hâc Ali b. el-Hâc Osman nâm kimesne meclis-i şer‘-i münîrde hudâvendigâr-ı esbak cennet-mekân firdevs-âşiyân Sultân Abdülhamid Han -aleyhi’r-rahmetü ve’l-gufrân- hazretleri evkāf-ı celîleleri kāimmakām-ı mütevellîsi ve evkāf-ı hümâyûn nâzırı ecille-i ricâl-i Devlet-i Aliyye’den sa‘âdetlü el-Hâc Yusuf Efendi hazretleri taraflarından vekîl-i şer‘îleri kasablar kethudâsı el-Hâc Hasan Ağa mahzarında takrîr-i kelâm edip vakf-ı müşârün-ileyh mülhakātından Yedikule hâricinde kâin gayrı-ez selhhâne-i mîrî on aded ganem selhhânelerinden sekizinci selhhâneye merbût kasab dükkânlarından Samatya Kapısı dâhilinde köşe başında kâin bir bâb kasab dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin nısf an-hums hisse-i şâyi‘asına bâ-temessük-i mütevellî bi’l-icâreteyn mutasarrıfe olan Ümmühani bt. Süleyman nâm hatun bilâ-veled fevt olup hisse-i mezkûresi mahlûl ve cânib-i vakf-ı müşârün-ileyhe âid ve râci‘ olmağla mütevellî-i müvekkil-i mûmâ-ileyh dahi hisse-i mezkûreyi bi’l-müzâyede karâr-dâdesi olup el-yevm mu‘accele mümâsili idüğü bi’l-ihbâr zâhir olan elli guruş mu‘accele ve müeccele-i kadîmesiyle bana îcâr ve teslîm buyurduklarında ben dahi istîcâr ve kabûl ve mu‘accele-i mezkûreyi mütevellî-i mûmâ-ileyhe def‘ ü teslîm ve umûr-ı vakf-ı şerîfe sarfla istihlâke emreylediğimde onlar dahi bi’t-tevliye kabz ve umûr-ı vakf-ı şerîfe sarfla istihlâk etmeleriyle mu‘accele-i müstehleke-i mezkûrenin adem-i istifâsına müte‘allika âmme-i da‘vâdan cânib-i vakf ve mütevellî-i mûmâ-ileyhin zimmetlerini kabûlü hâvî ibrâ ve ıskāt eyledim deyü takrîrini vekîl-i merkūm tasdîk etmeğin bu sûretde beyâten [beyânen] li’l-hısas mecmû‘-ı gedik-i mezkûr on sehm i‘tibârıyla bir sehm-i şâyi‘i defter-i vakf-ı şerîfde merkūm el-Hâc Ali uhdesine kayd ile taraf-ı vakıfdan yedine müceddeden temessük i‘tâsı iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî 17 min-Zilka‘deti’ş-şerîfe sene 1242