İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 469 Hüküm no: 417 Orijinal metin no: [78b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aslan v. Avram’ın, kazzaz gediğini Yasef v. Avram’a sattığı Kazzâz mübâya‘ası Ma‘rûz Kazzâz esnâfından Aslan v. Avram nâm Yahûdî meclis-i şer‘-i hatîrde esnâf-ı merkūmeden Yasef v. Avram nâm Yahûdî muvâcehesinde kazzâz esnâfının kethudâları Abdüllatif Ağa tarafından mürsel yiğitbaşısı Molla Mehmed hazır olduğu hâlde takrîr-i kelâm edip İstanbul’da Çarşı-yı Kebîr’de Çakır Ağa zukāğı demekle ma‘rûf sûkda Kalpakçılar karşısında Dülbendciler zukāğı başında Yağlıkçılar sûkunda basmacı dükkânına müntehî oluncaya değin zukāk tarafeyninde kâin dekâkînden Kazzâz Avram Yahûdî dükkânı ittisâlinde kâin bir bâb kazzâz dükkânı derûnunda mevcûde beyne’l-esnâf gedik ta‘bîr olunur bâ-sûret mâlik olduğum âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin mersûm Yasef Yahûdiye bin iki yüz guruş semen-i makbûza bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabz ve kabûl edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini [79a] kabûlü hâvî ibrâ ve ıskāt etmemizle fîmâ-ba‘d âlât-ı gedik-i mezkûr mersûm Yasef Yahûdinin mal-ı müşterâsı ve hakk-ı sırfı olup benim kat‘a alâkam kalmamışdır deyü ba‘de’l-ikrâr ve’t-tasdîk gedik-i mezkûrun bâyi‘-i mersûm Aslan Yahûdî ismine olan kaydı ref‘ ve terkīn ve atîk sûreti battalda hıfz ile müşteri-i mersûm Yasef Yahûdî ismine tashîhan kayd ve yedine müceddeden sûret i‘tâsını istid‘â eyledikleri İstanbul Mahkemesi’nden huzûr. Fî 24 min-Za sene 1242