İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 470 Hüküm no: 420 Orijinal metin no: [79a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Emine bt. Mehmed’in, kazzaz gediğini Ohannes v. Serkiz’e sattığı Kazzâz mübâya‘ası Ma‘ruz Mu‘arrefetü’z-zât Şerife Emine bt. Mehmed nâm hatun meclis-i şer‘-i enverde Sarrâf Poliçeci Ohannes v. Serkiz nâm zimmî muvâcehesinde kazzâz esnâfının kethudâları Abdüllatif Ağa tarafından mürsel Yiğitbaşı Molla Mehmed hazır olduğu hâlde takrîr-i kelâm edip İstanbul’da Çarşı-yı Kebîr’de Çakır Ağa zukāğı demekle ma‘rûf sûkda Kalpakçılar kurbünde Dülbendciler zukāğı başında Yağlıkçılar sûkunda basmacı dükkânına müntehî oluncaya değin zukāk tarafeyninde kâin dekâkînden Kazzâz Al Yanak Yahûdî dükkânı ittisâlinde kâin bir bâb kazzâz dükkânı derûnunda mevcûde beyne’l-esnâf gedik ta‘bîr olunur bâ-sûret mâlike olduğum âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin mersûm Ohannes zimmîye bin beş yüz guruş semen-i makbûza bey‘ ve temlîk ü teslîm ol dahi ber-vech-i muharrer iştirâ ve temellük ü tesellüm ve kabz ü kabûl edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz âharın zimmetini kabûlü hâvî ibrâ ve ıskāt etmemizle fîmâ-ba‘d âlât-ı gedik-i mezkûr dahi mesfûrun mal-ı müşterâsı ve hakk-ı sırfı olup benim asla ve kat‘a alâkam kalmamışdır deyü ba‘de’l-ikrâr ve’t-tasdîk gedik-i mezkûrun bâyi‘a-i mezbûre Şerife Emine Hatun ismine olan kaydı ref‘ ü terkīn ve atîk sûreti battalda hıfz ile müşteri-i mersûm Ohannes zimmî ismine tashîhan kayd ve yedine müceddeden sûret i‘tâsını istid‘â eyledikleri İstanbul Mahkemesi’nden huzûr. Fî 17 Za sene 1242