İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 471 Hüküm no: 421 Orijinal metin no: [79a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Çavuş b. Ali’nin, kasap gediği hissesini Hüseyin b. Ebubekir’e devrettiği Kasab ferâğı Ma‘rûz Hudâvendigâr-ı esbak cennet-mekân firdevs-âşiyân Sultân Abdülhamid Han -aleyhi’r-rahmetü ve’l-gufrân- hazretleri evkāf-ı celîlelerinden Yedikule hâricinde kâin gayrı-ez selhhâne-i mîrî on aded ganem selhhânelerinden üçüncü selhhâneye merbût Galata’da Azapkapısı’nda vâki‘ bir bâb kasab dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin nısf-ı şâyi‘ine bâ-temessük-i mütevellî bi’l-icâreteyn mutasarrıf olan Mahmud Çavuş b. Ali meclis-i şer‘-i münîrde kasab tâifesinden Hüseyin b. Ebîbekir nâm kimesne muvâcehesinde kasablar kethudâsı el-Hâc Hasan Ağa hazır olduğu hâlde takrîr-i kelâm edip ber-vech-i muharrer mutasarrıf olduğum nısf hisse-i şâyi‘amı hüsn-i rızâ ve tayyib-i hâtırım ve ferâğ-ı mu‘teber-i kat‘î ile bâ-re’y-i mütevellî merkūm Hüseyin’e ferâğ ve tefvîz ve vech-i lâyıkı üzre teslîm eylediğimde ol dahi ber-vech-i muharrer tefevvüz ve tesellüm ve kabz ve kabûl etmekle fîmâ-ba‘d nısf hisse-i mezkûre merkūm Hüseyin’in dâhil-i havza-i tasarrufu ve hakk-ı müfevvazı olup benim alâkam kalmamışdır deyü ba‘de’t-takrîr ve’t-tasdîk nısf hisse-i mezkûre fâriğ-i mezbûrun ferâğ ve kasr-ı yedinden mütefevvaz ve mezbûr Hüseyin uhdesine kayd ile hâmiş-i temessüke tahrîr ve temhîr ve yedine i‘tâ olunmasını istid‘â eylediği İstanbul Mahkemesi’nden huzûr-ı âlîlerine i‘lâm olundu. Fî 17 min-Za sene 1242 [Beyaz]