İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 473 Hüküm no: 423 Orijinal metin no: [79b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin ve kız kardeşlerinin, babalarından kalan kasab gediğini Ali Ağa b. İbrahim ile yeğenine devrettikleri Kasab ferâğı Ma‘rûz Hudâvendigâr-ı esbak cennet-mekân firdevs-âşiyân Sultân Abdülhamid Han -aleyhi’r-rahmetü ve’l-gufrân- hazretleri evkāf-ı celîleleri mülhakātından Yedikule hâricinde kâin gayrı-ez selhhâne-i mîrî on aded ganem selhhânelerinden beşinci selhhâneye merbût Lâleli Çeşme karşısında kâin bir bâb kasab dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeye bâ-temessük-i mütevellî bi’l-icâreteyn mutasarrıf olan Mehmed b. Ali fevt olup gedik-i mezkûr sulbî kebîr oğlu Mehmed Emin ve sulbiye kebîre kızları Hafîze ve Hadice’ye eslâsen ba‘de’l-intikāl mezbûr Mehmed Emin kendi nefsinden asâleten ve kız karındaşları merkūmetân Hafize ve Hadîce Hatunlar taraflarından ber-vech-i âtî ferâğa vekîlleri olduğu zâtlarını ârifân Ömer b. el-Hâc Hasan ve İsmail b. Osman nâm kimesneler şehâdetleriyle sâbit olmağla vekâleten meclis-i şer‘-i münîrde kendi nefsinden asîl ve yeğeni es-Seyyid Ali Ağa b. es-Seyyid İbrahim tarafından tasdîka vekîli es-Seyyid Mehmed Ağa b. el-Hâc Halil muvâcehesinde bi’l-asâle ve bi’l-vekâle takrîr-i kelâm edip ben âlât-ı gedik-i mezkûru kendim ve müvekkilelerim mezbûretânın hüsn-i rızâ ve tayyib-i hâtırımız ve ferâğ-ı mu‘teber-i kat‘î ile bedel-i ma‘lûm ve makbûz mukābelesinde asîl ve müvekkil-i mezbûrân es-Seyyid Mehmed Ağa ve es-Seyyid Ali Ağa’ya bi’l-asâle ve bi’l-vekâle ferâğ ve tefvîz ve teslîm eylediğimde asîl ve vekîl-i mezbûr dahi asâleten ve vekâleten tefevvüz ve kabûl etmekle fîmâ-ba‘d gedik-i mezkûr mezbûrânın bi’l-münâsafa dâhil-i havza-i tasarrufları olup benim ve müvekkilelerim mezbûretânın alâkamız kalmamışdır deyü ba‘de’t-takrîr ve’t-tasdîk gedik-i mezkûrun defter-i vakf-ı şerîfde müteveffâ-yı merkūm ismine olan kaydı terkīn ve mezbûrân es-Seyyid Mehmed Ağa ve es-Seyyid Ali Ağa uhdelerine kayd ile yedlerine temessük i‘tâsını istid‘â eyledikleri İstanbul Mahkemesi’nden huzûr-ı âlîlerine i‘lâm olundu. Fî 17 min-Za sene 1242