İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 472 Hüküm no: 422 Orijinal metin no: [79b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Şükrü ve Ayşe Hatun’un babalarından intikal eden kasap gediğini, Ahmed Ağa’ya devrettikleri Kasab ferâğı Ma‘rûz Hudâvendigâr-ı esbak cennet-mekân bihşt-âşiyân Sultân Abdülhamid Han -subbet aleyhi siccâlü’r-rahmetü ve’l-gufrân- hazretleri evkāf-ı celîleleri mülhakātından Yedikule hâricinde kâin gayrı-ez selhhâne-i mîrî on aded ganem selhhânelerinden yedinci selhhâneye merbût kasab dükkânlarında hudâvendigâr-ı esbak cennet-mekân Sultân Bâyezid-i Velî Han -aleyhi’r-rahmetü ve’l-gufrân- Hazretleri Câmi‘-i şerîfi kurbünde Kuşbâzlar nâm mahâlde kâin bir bâb kasab dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeye bâ-temessük-i mütevellî bi’l-icâreteyn mutasarrıf olan Mustafa b. el-Hâc Ahmed nâm kimesne bundan akdem fevt olup âlât-ı gedik-i merkūm sulbî kebîr oğlu Mehmed Şükrü ve sulbiye kebîre kızı Âişe Hatun’a intikāl eylediği kasablar kethudâsı el-Hâc Hasan Ağa ve sâir mevsûku’l-kelim Müslimîn haberleriyle ba‘de’t-tahakkuk kendi nefsinden asîl ve hemşîresi mezbûre Âişe Hatun tarafından husûs-ı âtîde vekîl olduğu zât-ı mezbûreyi ârifân Mehmed b. Mustafa ve es-Seyyid Osman b. Mustafa nâm kimesneler şehâdetleriyle sâbit olan merkūm Mehmed Şükrü meclis-i şer‘-i münîrde kasab ustası Ahmed Ağa’nın babası ve tarafından tasdîka vekîl-i müsecceli el-Hâc Ali b. Abdullah nâm kimesne muvâcehesinde ber-vech-i muharrer bi’l-intikāl mutasarrıf olduğumuz âlât-ı gedik-i mezkûru hüsn-i rızâ ve tayyib-i hâtırımız ve ferâğ-ı mu‘teber-i kat‘î ile bedel-i ma‘lûm ve makbûz mukābelesinde bâ-re’y-i mütevellî müvekkil-i merkūm Ahmed Ağa’ya bi’l-asâle ve bi’l-vekâle ferâğ ve tefvîz ve teslîm ol dahi tefevvüz ve tesellüm ve kabûl etmekle fîmâ-ba‘d âlât-ı gedik-i mezkûr bâ-re’y-i mütevellî müvekkil-i merkūm Ahmed Ağa’nın dâhil-i havza-i tasarrufu olup benim ve müvekkilem mezbûrenin kat‘a alâkamız kalmamışdır deyü ba‘de’t-takrîr ve’t-tasdîk gedik-i mezkûrun müteveffâ-yı mezbûr üzerinde olan kaydı defter-i vakf-ı şerîfden ref‘ ve terkīn ve mezbûr Ahmed Ağa uhdesine kayd ile atîk temessükü zâyi‘ olmuş olduğundan yed-i âharda zuhûr eder ise amel ve i‘tibâr olunmamak şartıyla taraf-ı vakıfdan yedine müceddeden temessük i‘tâ olunmasını istid‘â eyledikleri İstanbul Mahkemesi’nden huzûr. Fî-selh-i L sene 1242