İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 477 Hüküm no: 427 Orijinal metin no: [80b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrişim bükücü esnafının boş kalan tezgahları kalfalarına tahsis ederken ustalardan Manas v. Atam’a verilmek istendiği İbrişim bükücü esnâfı kalfalarına dâir Ma‘rûz Mübârek rikâb-ı kamer-tâb-ı hazret-i hilâfet-penâhîye takdîm-i<> arzuhâl eden İstanbul’da Fazlı Paşa Sarayı arsasında mütemekkinler ibrişim bükücü esnâfı kalfalarından Ağya v. Eremya ve Toros v. Serkiz ve karındaşı Yuvan ve Mikayil veledey Avakim nâm zimmîler evvelen Çarşamba günü Arz Odası’nda huzûr-ı bâhirü’n-nûr-ı âsafânelerinde ve ba‘dehû dâ‘îhânelerinde ma‘kūd meclis-i şer‘-i münîrde esnâf-ı merkūme ustalarından İstefan v. Abraham nâm zimmî muvâcehesinde kethudâları Abdüllatif Ağa ve yiğitbaşısı Molla Mehmed ve ustabaşısı Molla Ali ve ihtiyârlarından mazbûtü’l-esâmî ehl-i İslâm ve re‘âyâ ve sâirleri hazır oldukları hâlde biz zikrolunan ibrişim bükücü esnâfı kalfalarından olup zahr-ı arzuhâlde kaydı derkenâr olunan i‘lâm mantûkunca kadîmden beri zikrolunan Fazlı Paşa Sarayı arsasında kâin yetmiş aded ibrişim bükücü destgâhlarından âhara bey‘ olunmak iktizâ ettikde destgâh sahibi olan ustaya bey‘ olunmayıp semen-i misliyle kalfaların akdemine bey‘ olunmak ve kirâya verilmek iktizâ edenleri dahi kezâlik ustalara verilmeyip ecr-i misliyle kalfaların akdemine kefîl-i kavîsi alınarak kirâya verilmek yalnız tarafeynin ta‘ahhüdüyle bilâ-emr nizâmımızdan iken mersûm İstefan zimmî mâlik olduğu bir destgâhını iki bin dokuz yüz elli guruş semen-i misliyle hazır bi’l-meclis esnâf-ı merkūme ustalarından destgâh mâliki Manas v. Atam zimmîye bey‘ murâd edip lâkin mücerred i‘lâmda destgâh sahibi ustaya verilmemek muharrer olduğundan iki bin guruşa bize vermesi’çün cebr olunmak murâdımızdır [deyü] tesâddî eyledikleri da‘vâları şer‘an mesmû‘a olmadığından mâ‘adâ destgâh mâliki mersûm cevâbında i‘lâm-ı mezkûrda bu makūle bey‘ olunan destgâhlar mülâzım kalfalara semen-i misilleriyle verilmek münderic olup değerinden noksan teklîfi nizâm-ı mezkûra dahi münâfî olmağla semen-i misilleriyle kabûl ederler ise onlara verip istinkâf ederler ise ustalara bey‘im şurût-ı nizâma dahi muhâlif değildir deyü îrâd eylediği kelâmı hakka makrûn olup li-ecli’l-iskât birkaç def‘a semen-i misilleriyle almaları müdde‘ûn-ı mesfûrûna teklîf olundukda kabûl etmeyip mücerred iki bin guruşa bize versinler deyü ısrarları şer‘-i şerîf ve kānûn-ı münîfe ve şurût-ı nizâma mugāyir olmağla bir vechile iltifâta şâyân olmayıp ber-minvâl-i muharrer semen-i misliyle almamaları istinkifâtdan ibâret olmağla bu sûretde semen-i misliyle tâlib <<âhar>> olan âhar ustaya bey‘ine mümâna‘at olunmamak iktizâ eylediği İstanbul Mahkemesi’nden huzûr. Fî 9 min-Z sene 1242