İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 476 Hüküm no: 426 Orijinal metin no: [80a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bağcı ve şemseci esnafının,imal ve satış süreçlerinin nizama bağlandığı Bağcı ve şemseci esnâfına müte‘allik Ma‘rûz Bâlâsı sahh-ı âlî ile müveşşah sırmadan tesbih harcı ve çaprast ve şemse ve sâir bu makūle eşyâ i‘mâl eden bağcı ve şemseci ta‘bîr olunur esnâf zikrolunan eşyânın derûnuna mürdeseng ve sâir buna mümâsil nesneyi sanî‘at ve hîle ile sıkıştırıp ibâdullâha altın ve gümüş bahâsına bey‘ ve füruht eyledikleri bu esnâda tutularak bi’l-müşâhede hıyânetleri ma‘lûm ve saçakçı esnâfının dahi i‘mâl eyledikleri saçak eşyâsının iplikden ma‘mûl olanını tire deyü satarak bunlar dahi ibâdullâha zarardan hâlî olmadıkları mütehakkık ve meczûm olmağın fîmâ-ba‘d esnâf-ı merkūmenin i‘mâl edecekleri eşyânın sahîh ve redîsi anlaşılarak ibâdullâhın zarar ve hasârdan vikāyeleri zımnında kazzâzlar kethudâsı Abdüllatif Ağa’yı nezdinize celb ve eşyâ-yı merkūmenin dahi kazzâz emti‘ası misillü temhîr olunmak üzre bir hüsn-i nizâm ve zâbıtaya rabt ve tevsîkiyle keyfiyeti i‘lâma mübâderet eyleyesin deyü bu dâ‘îlerine hitâben sâdır olan fermân-ı âlîlerine imtisâlen sâlifü’z-zikr bağcı ve şemseci ve saçakçı esnâfından mazbûtü’l-esâmî zimmîler ve Yahûdiler meclis-i şer‘a ihzâr ve hazır bi’l-meclis kazzâzlar kethudâsı Abdüllatif Ağa kulları muvâcehesinde emr-i âlî-i mezkûr kırâet ve mantûk-ı münîfi cümlesine tebâ‘at olundukdan sonra el-yevm ibrişim ve keci ile mahlût kafesli saçağın bir vakıyyesi yüz dokuz guruşa olup ribh-i şer‘î ve irâdeleri üzre karâr bulduğu vechile beher dirheminden birer akçe alınmak üzre iktizâ eden <<üzre karâr bulduğu vechile>> tamga mesârifi zammıyla yüz yirmi üç guruş on üç para bir akçeye ve yalnız Bursa eğirmesinden i‘mâl olunan elvan kafesli saçağın bir vakıyyesi elli yedi guruşa olup ribh-i şer‘î ve beher dirheminden yarımşar akçe alınmak üzre îcâb eden tamga mesârifi zammıyla altmış dört guruş altı para iki akçeye ve İstanbul kecisinden i‘mâl olunan elvan kafesli saçağın bir vakıyyesi kırk bir guruşa olup kâr ve kezâlik dirheminden yarımşar akçe tamga mesârifi zammıyla kırk altı guruş yirmi altı para iki akçeye ve evsat Bursa kecisinden i‘mâl olunan elvan kafesli saçağın bir vakıyyesi otuz sekiz guruşa olup fâide ve kezâlik dirheminden yarımşar akçe tamga masrafı zammıyla kırk üç guruş altı para iki akçeye ve ednâ Bursa kecisinden i‘mâl olunan elvan kafesli saçağın bir vakıyyesi yirmi iki guruşa olup fâide ve kezâlik dirheminden yarımşar akçe tamga <> masrafı zammıyla yirmi beş guruş yirmi altı para iki akçeye ve sade ve tireden beyâz kafesli ve kafessiz saçağın bir vakıyyesi otuz guruşa olup fâide ve dirheminden yarımşar akçe masrafı zammıyla otuz <> dört guruş yirmi altı para iki akçe ve elvan tireden i‘mâl olunan kafesli ve kafessiz saçağın bir vakıyyesi [80b] otuz üç guruşa olup fâide ve dirheminde yarımşar akçe tamga masrafı zammıyla otuz yedi guruş yirmi altı para iki akçe ve elvan iplikden i‘mâl olunan kafesli ve kafessiz saçağın bir vakıyyesi on beş guruşa olup fâide ve dirheminden yarımşar akçe tamga masrafı zammıyla on sekiz guruş altı para iki akçeye bâliğ olup ol vechile ibâdullâha bey‘ etmeleri ve sâlifü’z-zikr sırmadan i‘mâl olunan eşyâ-i mütenevvi‘anın beher dirheminden yarımşar para tamga masrafı alınıp gerek sırmadan ma‘mûl eşyâ ve gerek saçağı kazzâz emti‘ası misillü sahîh ve redîsi ve ecnâsı tebeyyün etmek ve fiyât-ı mezkûre tenezzül ve tefâvüt buldukça her birinin fiyâtını tebyîn etmek <> ve bu vechile ibâdullâh hasârdan masûn olmak için ber-vech-i emânet temhîre me’mûr merkūm Abdüllatif Ağa’ya bu def‘a esnâf-ı merkūmeye kethudâ nasb olunan el-Hâc Mehmed Ağa ma‘rifetiyle temhîr ettirmeleri ve bilâ-mühür dükkânlarında eşyâ-i mezkûreyi bey‘ etmeleri ve şifâhen sâdır olan fermân-ı âlîleri üzre eşyâ-i mezkûre min-ba‘d menzillerinde dahi i‘mâl olunarak hufyeten elden satmamaları esnâf-ı merkūme[ye] ifâde ve tenbîh olundukda cümlesi ol vechile bey‘ ve harekete ta‘ahhüd ve hilâf-ı emr-i âlî hâlâta tesâddî eder olur ise tedîbât-ı lâyıkasına râzılar olmalarıyla bu sûretde işbu tescîl olunan nizâm dahi kazzâz emti‘ası nizâmı misillü Başmuhâsebe’ye ba‘de’l-kayd düstûrü’l-amel tutulmak üzre şurût-ı lâzımesi derciyle merkūm Abdüllatif Ağa yedine bir kıt‘a sûret ve eşyâ-i mezkûre bilâ-mühür taşraya çıkmamak maslahatı’çün emti‘a gümrüğü emîni efendi bendelerine ve sâir iktizâ edenlere birer kıt‘a ilm u haberi i‘tâ olunmak iktizâ eylediği muktezâ-yı maslahat idüğü İstanbul Mahkemesi’nden huzûr. Fî 27 N sene 1242 Tesvîdden kayd-şüd