İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 479 Hüküm no: 429 Orijinal metin no: [80b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Naile bt. Mehmed’in, Yağlıkçı Hasan Ağa’nın, kendiarasasını fuzuli zabtettiğini iddia ettiği
Arsa keşfi
Ma‘rûz
Sâdır olan fermân-ı âlîlerine imtisâlen zikri câ’î husûsu mahâllinde lede’l-mu‘âyene keşf ve tahkīk için savb-ı şer‘-i enverden me’zûnen irsâl olunan Kâtib es-Seyyid Ahmed Efendi dâ‘îleri [ve] hâssa mi‘mârı hulefâsından es-Seyyid Mehmed Râşid ve Sâfî Mustafa Halîfeler ile nezâret-i dâ‘îlerinde olan evkāfdan galle ve tevliyeti İstanbul’da Hasan Paşa Hânı kurbünde Sekbânbaşı Yakub Ağa Câmi‘-i şerîfi imâm ve müezzinine meşrûta merhûm Arayıcıbaşı Musa Halîfe Vakfı müstagallâtından İstanbul’da Sultân Bâyezid-i Velî Câmi‘i kurbünde Kâtib Sinan mahallesinde kâin zikri âtî münâza‘un-fîh olan menzil arsalarına varıp huzûr-ı Müslimînde akd-i meclis-i şer‘-i âlî ettikde vakf-ı mezbûr müsakkafâtından münâza‘un-fîh olan arsa-i mezkûreye bâ-temessük-i mütevellî bi’l-icâreteyn mutasarrıfe olan sahibe-i arzuhâl mu‘arrefetü’z-zât Nâile bt. Mehmed nâm hatun meclis-i ma‘kūd-ı mezkûrda yine vakf-ı mezkûr müsakkafâtından münâza‘un-fîh olan arsa-i mezkûre ittisâlinde kâin bir bâb menzil arsasına kezâlik bâ-temessük-i mütevellî bi’l-icâreteyn mustasarrıf olan derûn-ı arzuhâlde ismi mezkûr Yağlıkçı el-Hâc Hasan Ağa b. el-Hâc İbrahim nâm kimesne muvâcehesinde vakf-ı mezbûrun bi’l-meşrûta mütevellîsi es-Seyyid Mehmed Efendi hazır olduğu hâlde mezbûr el-Hâc Hasan Ağa benim mutasarrıfe olduğum arsa-i mezkûreden mi‘mârân-ı mezbûrân misâhalarıyla tûlen on bir zirâ‘ ve arzan bir buçuk zirâ‘ mahâllini fuzûlî zabt ve vaz‘-ı yed etmekle keff-i yedine tenbîh [81a] olunmasını da‘vâya tesâddî etmişdim el-hâletü hâzihî merkūm el-Hâc Hasan Ağa münâza‘un-fîh olan mahâll-i mezkûrun nısfından bâ-re’y-i mütevellî rızâsıyla keff-i yed ve bana teslîm eylediğinde ben dahi mezbûrun menzilinin ta‘mîri kadîmi üzre benim menzilim tahtından cereyân etmesi husûsuna kat‘a mümâna‘at etmemeğe ta‘ahhüd edip bu vechile kat‘-ı nizâ‘ eyledik deyü takrîr ve tasdîklerini kâtib-i mezbûr mahâllinde ketb ve tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr eylediği İstanbul Mahkemesi’nden huzûr.
Fî 20 min-Z sene 1242
|