İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 479 Hüküm no: 430 Orijinal metin no: [81a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. İsmail’in, annesi Fâtıma Hatun bt. Ebubekir’in velâyeti altında Mehmed Ataullah Efendi’den boşandığı Bi’l-velâye muhâla‘a Ma‘rûz Bâ-işâret-i bâhirü’l-bişâret-i hazret-i şeyhülislâm-ı sellemehü’s-selâmî sâdır olan fermân-ı âlî-şâna imtisâlen mahmiye-i İstanbul’da Çatladıkapı dâhilinde sâkine zâtı mu‘arrefe Fâtıma Hatun bt. el-Hâc Ebûbekir meclis-i şer‘-i münîrde dâmadı Mahmud Paşa Mahkemesi ketebesinden derûn-ı arzuhâlde ismi mezkûr Mehmed Emin Efendi ibnü’l-merhûm Mehmed Ataullah Efendi muvâcehesinde mezbûr Mehmed Emin Efendi sadriye mürâhıka kızım hâzıra bi’l-meclis tahmînen on bir yaşında Emine bt. İsmail’in dört yüz guruş mihr-i mu‘accel ve üç yüz guruş mihr-i müeccel tesmiyeleriyle zevc-i dâhili olup lâkin beynlerinde münâferet vâkı‘a olmağla mihreyn-i mezkûreyn üzerlerine ve nafaka-i iddet-i ma‘lûme ve meûnet-i süknâsı dahi benim üzerime olmak üzre ben bi’l-velâye muhâla‘a-i sahîhayla hul‘ <> eylediğimde ol dahi hul‘-ı mezkûru ba‘de’l-kabûl kızım mürâhıka-i mezbûrenin eşyâ-i memlûkesinden zevci mezbûrun alıkoyup istihlâk eylediği bir elmas yüzük ve bir sîm âyine ve bir İngiliz-kârî şâl ve bir dülbend antârî ve bir basma şalvar ve bir silecek ve iki havli ve bir peştemal ve bir fes ve bir yemenînin kıymet-i şer‘iyeleri idüğü bi’l-ihbâr tâhir [zâhir] olan iki yüz elli guruşu zamânen ve bâ-defter-i müfredât eşyâ-i sâiresini dahi aynen kızım mürâhıka-i mezbûre için bana def‘ ü teslîm ben dahi bi’l-velâye ahz ü kabz edip fîmâ-ba‘d kızım mezbûrenin merkūm Mehmed Emin Efendi zimmetinde bir nesnesi bâkī ve benim dahi bi’l-velâye kat‘a da‘vâ ve nizâ‘ ve husûmetim kalmamağla eğer kızım mezbûre ba‘de’l-bulûğ zevci mezbûr Mehmed Emin Efendi’den mihreyn-i mezkûreynini yahud cihât-ı sâireden bir nesne da‘vâ ve şer‘an ahz eder ise mikdâr-ı me’hûzuna ben kefâlet-i sahîha ile kefîl ve zâmineyim deyü mukırre-i mezbûre Fâtıma Hatun’un bi’l-cümle takrîr-i meşrûhunu mezbûr Mehmed Emin Efendi tasdîk ve kefâlet-i mezkûreyi kabûl edip kat‘-ı nizâ‘ eyledikleri İstanbul Mahkemesi’nden huzûr. Fî 16 min-Z sene 1242