İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 511 Hüküm no: 459 Orijinal metin no: [86b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esirci Ahmed Efendi b. Ali ile Ketânî Osman Ağa b. Ahmed’in kerestecilik ortaklığından ibraları Şirketden ibrâ Ma‘rûz Sahib-i arzuhâl Esîrci es-Seyyid Ahmed Efendi b. Hâfız Ali nâm kimesne meclis-i şer‘-i münîrde arzuhâlde ismi mezkûr Ketânî Osman Ağa b. Ahmed nâm kimesne muvâcehesinde ben sene-i sâbıkā Şa‘bâni’l-mu‘azzamının yirmi birinci günü mâlımdan iki bin beş yüz guruş ve merkūm Osman Ağa dahi mâlından beş yüz guruş ki cem‘an üç bin guruş ikrâz ve birbirine halt ile fâide-i hâsıla beynimizde beraber iktisâm olunmak üzre kereste ticâretinde bir sene müddet şerîkler olup ba‘dehû fesh-i akd-i şirket-birle hesâbımızı mahzar-ı şühûdda sehv ve galatdan ârî yegān yegān sahîhan rü’yet eylediğimizde merkūm Osman Ağa kābız-ı mâl olmak takrîbiyle re’s-i mal-ı mezkûrumu mukaddemâ kabz etmemle mâ‘adâ müddet-i mezkûrede hâsıla olan bin üç yüz elli üç guruş fâideden benim nısf hisseme isâbet eden altı yüz yetmiş altı buçuk guruşun yüz elli beş guruşuna mukābil mâlından ma‘lûmü’l-ecnâs ve’l-fiyât keresteyi bana bey‘ ve semenini ol mikdâr guruşa takās ve bâkī beş yüz yirmi bir buçuk guruşun üç yüz yetmiş bir guruşunu mukaddemâ ve yüz elli buçuk guruşunu dahi bu def‘a huzûr-ı şer‘de nakden bana edâ ve teslîm ben dahi yedinden ber-vech-i muharrer iştirâ ve tesellüm ve mukāssa ve ahz ü kabz ve kabûl edip ol vechile meblağ-ı merkūm altı yüz yetmiş altı buçuk guruşu istifâ etmemle bi’l-cümle husûs-ı şirkete ve hesâbda galat vukū‘una ve sâir beynimizde cereyân eden cemî‘ hukūk-ı şer‘iyeye müte‘allika âmme-i da‘vâdan tarafeyden her birimiz âharın zimmetini ibrâ-i âmm-ı sahîh-i şer‘î ile ibrâ ve ıskāt ve her birimiz ber-vech-i muharrer âharın ibrâsını kabûl eyledik deyü ikrâr ve tasdîkleri İstanbul Mahkemesi’nden huzûr. Fî 13 Ş sene [1]242 [Beyaz]