İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 510 Hüküm no: 458 Orijinal metin no: [86b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aci Markar v. Delot’un, Yağcı Hanı’ndaki bir oda gediğini İstefan v. Nazroni’ye sattığı Yağcı Hânı’nda bir bâb oda gediği mübâya‘ası Ma‘rûz İstanbul’da Nûr-ı Osmânî Câmi‘-i şerîfi kurbünde vâki‘ Yağcı Hânı odabaşısı Aci Markar v. Delot nâm zimmî meclis-i şer‘-i münîrde İstefan v. Nazroni muvâcehesinde zikrolunan Nûr-ı Osmânî Câmi‘-i şerîfi kurbünde kâin defterdâr-ı esbak-ı merhûm Abdüsselam Efendi Vakfı müsakkafâtından Yağcı Hânı demekle ma‘rûf ma‘lûmü’l-hudûd bir bâb kârgir hânın tabaka-i ulyâsında Sofcular Hânı cânibinde vâki‘ köşeye muttasıl kadîmi şehriye altı guruş kirâlı bir bâb oda derûnunda mevcûde gedik ta‘bîr olunur akd-i âti’z-zikrin sudûruna değin bir kıt‘a sûret mûcibince yedimde emvâlim olan âlât-ı lâzıme-i ma‘lûmeyi tarafeynden bi’l-îcâb ve’l-kabûl bâtten ve sahîhan bi-safkatin vâhidetin bin yedi yüz guruş semen-i makbûza mesfûr İstefan zimmîye bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve ıskāt dahi etmemizle fîmâ-ba‘d zikrolunan oda gediği ta‘bîr olunur âlât-ı lâzıme-i ma‘lûme mersûm İstefan zimmînin mal-ı müşterâsı ve hakk-ı sarîhi olup benim kat‘a alâka ve medhalim kalmamışdır deyü ba‘de’l-ikrâr ve’t-tasdîk zikrolunan oda gediğinin kayd-ı evveli bâyi‘-i mersûm Aci Markar zimmî üzerinden ref‘ ü terkīn ve atîk sûreti kaleminde battalda hıfz olunup müşteri-i mersûm İstefan zimmî ismine tashîhan kayd ile yedine sûret i‘tâsı bâbında istid‘â-yı inâyet eyledikleri İstanbul Mahkemesi’nden huzûr. Fî 28 min-Zilhicce sene 1242