İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 514 Hüküm no: 464 Orijinal metin no: [87a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sırıkçılardan boşalan mahalle tuhafçı gedikleri nakledilirken Abraham v. Yoseb’in de Harosima bt. İstefan adına kayıtlı tuhafçı gediğini naklettiği Nakl-i gedik-i tuhafçı Ma‘rûz Âsitâne-i aliyyede vâki‘ tuhafçı ve fincâncı esnâfından Abraham v. Yoseb nâm zimmî meclis-i şer‘-i münîrde esnâf-ı merkūme kethudâsı Ahmed Efendi ve vekîli es-Seyyid Ahmed Ağa ve yiğitbaşı Menteş Yahûdî ve bi’l-cümle esnâf-ı merkūme ustaları hazır oldukları hâlde İstanbul’da Sultân Bâyezid’de Kolluk tahtında çeşme sırasında kâin Hâfız Mehmed Emin Ağa dükkânı ittisâlinde vâki‘ Başmuhâsebe’de Harosima bt. İstefan Nasrâniye ismine mukayyed ve mu‘teber gedik âlâtı bâ-i‘lâm-ı şer‘î Nasrâniye-i mersûmeden bâ-i‘lâm-ı şer‘î şirâen mâlım iken dükkân-ı mezkûr bi-inâyetillâhi te‘âlâ hedm ve ilgā ve gediklerimizin Çarşı-yı Kebîr’de sırıkçı dükkânları olan mahalle nakli husûsuna irâde-i seniyye ta‘alluk ederek sâlifü’z-zikr sırıkçı dükkânlarının hevâî gediklerini mi‘mâr ağa ma‘rifetiyle ashâbından bi’l-iştirâ imhâ etmemizle ber-vech-i muharrer mâlik olduğum mu‘teber gedik âlâtı çarşı-yı mezkûrda Osmâniye kapısı tarafından ad ile dördüncü kemer tahtında vâki‘ taht-ı icâremde olan mu‘teber gedikden ârî bir bâb kârgir mağazaya nakl ile kaleminden sûret i‘tâsı niyâzımdır deyü istid‘â ve keyfiyet minvâl-i muharrer üzre olduğunu esnâf-ı hâzırûn-ı merkūmûn ihbâr ve inhâ etmeleriyle ber-vech-i istid‘â ismine tashîhan sûret i‘tâsı iktizâ eylediği İstanbul Mahkemesi’nden huzûr. Fî 14 min-Z sene [1]242