İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 515 Hüküm no: 465 Orijinal metin no: [87a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sırıkçılardan boşalan mahalle tuhafçı gedikleri nakledilirken Kirkor v. Avadik ile İstefan v. Kirkor’un da şirâen malları olan tuhafçı gediğini naklettiği Tuhafçı gediği nakli Ma‘rûz Âsitâne-i aliyyede vâki‘ tuhafçı ve fincâncı esnâfından Kirkor v. Avadik ve İstefan v. Kirkor zimmîler meclis-i şer‘-i münîrde esnâf-ı merkūme kethudâsı Ahmed Efendi ve vekîli es-Seyyid Mehmed Ağa ve yiğitbaşı Menteş Yahûdî ve bi’l-cümle esnâf-ı merkūme ustaları hazır oldukları hâlde İstanbul’da Sultân Bâyezid’de Kolluk tahtında çeşme sırasında Kigork dükkânına muttasıl Başmuhâsebe’de Serpohi Nasrâniye ismine mukayyed ve mu‘teber gedik âlâtı Nasrâniye-i mesfûreden şirâen iştirâken ve şâyi‘an mâlımız iken [87b] dükkân-ı mezkûr bi-inâyetillâhi te‘âlâ hedm ü ilgā ve gediklerimizin Çarşı-yı Kebîr’de sırıkçı dükkânları olan mahalle nakli husûsuna irâde-i seniyye ta‘alluk ederek sâlifü’z-zikr sırıkçı dükkânlarının hevâî gediklerini mi‘mâr ağa ma‘rifetiyle ashâbından bi’l-iştirâ imhâ etmemizle ber-vech-i muharrer mâlik olduğumuz mu‘teber gedik âlâtı çarşı-yı mezkûrda Osmâniye kapısı tarafından ad ile altıncı kemer tahtında vâki‘ taht-ı icâremde olan mu‘teber gedikden ârî bir bâb kârgir mağazaya nakl ile kaleminden sûret i‘tâsı niyâzımızdır deyü istid‘â ve keyfiyet minvâl-i muharrer üzre olduğunu esnâf-ı hâzırûn-ı merkūmûn ihbâr ve inhâ etmeleriyle ber-vech-i istid‘â sûret i‘tâsı iktizâ eylediği İstanbul Mahkemesi’nden huzûr. Fî 14 min-Z sene 1242