İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 518 Hüküm no: 470 Orijinal metin no: [87b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sırıkçılardan boşalan mahalle tuhafçı gedikleri nakledilirken Sofya bt. İstefan’ın da şiraen malı olan tuhafçı gediğini naklettiği Nakl-i tuhafçı Ma‘rûz Mahrûse-i Galata’ya muzâfe Beşiktaş nâhiyesine tâbi‘ Ortaköy’de mütemekkine Aydın oğlu zevcesi Sofya bt. İstefan Nasrâniyenin vekîl-i şer‘îsi Tatos v. Filyos nâm zimmî meclis-i şer‘-i münîrde Âsitâne-i aliyyede vâki‘ tuhafçı ve fincâncı esnâfının kethudâsı el-Hâc Ahmed Efendi ve vekîli es-Seyyid Mehmed Ağa ve yiğitbaşı Menteş Yahûdî ve bi’l-cümle esnâf-ı merkūme ustaları hazır oldukları hâlde İstanbul’da Sultân Bâyezid’de Kolluk tahtında çeşme sırasında kâin Başmuhâsebe’de Ohannes zimmî ismine mukayyed ve mu‘teber tuhafçı ve fincâncı gediği âlâtı müvekkilem mersûme Sofya Nasrâniyenin mâliki mersûmdan bâ-hüccet iştirâ ile mâlı iken dükkân-ı mezkûr bi-inâyetillâhi te‘âlâ hedm ü ilgā ve gediklerinin Çarşı-yı Kebîr’de sırıkçı dükkânları mahalle nakli husûsuna irâde-i seniyye ta‘alluk ederek sâlifü’z-zikr sırıkçı dükkânlarının hevâî gediklerinin mi‘mâr ağa ma‘rifetiyle ashâbından bi’l-iştirâ [88a] imhâ etmemizle müvekkilem mersûmenin ber-vech-i muharrer mâlike olduğu mu‘teber gedik âlâtı çarşı-yı mezkûrda Osmâniye kapısı tarafından ad ile on dördüncü kemer tahtında vâki‘ taht-ı icâresinde olan mu‘teber gedikden ârî bir bâb kârgir mağazaya nakl ile ismine tashîhan kaleminden sûret i‘tâsı bi’l-vekâle niyâzımdır deyü istid‘â ve keyfiyet minvâl-i muharrer üzre olduğunu esnâf-ı hâzırûn-ı merkūmûn ihbâr ve inhâ etmeleriyle ber-vech-i istid‘â sûret i‘tâsı iktizâ eylediği İstanbul Mahkemesi’nden huzûr. Fî 14 min-Z sene 1242