İstanbul Mahkemesi 148 Numaralı Sicil (H. 1241-1242 / M. 1826-1827) cilt: 90, sayfa: 518 Hüküm no: 471 Orijinal metin no: [88a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kapatılan arpacı dükkânlarının vasî marifetiyle mallarının satılıp bedellerinin vekillerine teslim edildiği Mefkūd arpacıların Ma‘rûz Âsitâne-i aliyyede Kapan-ı dakīk hâric ve dâhilinde vâki‘ bi’l-cümle arpacı esnâfı bundan akdem bâ-emr-i âlî vilâyetlerine i‘zâm olunmuş ve esnâf-ı merkūmenin mahâll-i merkūmda kâin dükkânları sedd ü bend ile mezbûrûnun gerek cânib-i mîrî ve gerek tüccâra olan deynleri ve ba‘zı kesân zimmetlerinde matlûbâtları alâ-hâlihî kalmış olduğundan bahisle merkūmûnun mâlları olup dekâkîn-i mezkûrînin derûnlarında mevcûd zahîreleri ma‘rifet-i şer‘ ve tüccâr ma‘rifetleri ve semen-i misilleriyle âhara füruht olunarak semenleri mîrî ve kapan tüccârına olan deynlerine ba‘de’l-edâ ve fazla kalır ise esnâf-ı merkūme tarafına teslîm olunması bâbında ricâl-i Devlet-i Aliyye’den hâlâ zahîre nâzırı izzetlü Mehmed Ârif Efendi bendelerinin memhûr takrîri bâlâsına unvânı sahh-ı âlî ile müveşşah bu dâ‘îlerine hitâben sâdır olan fermân-ı âlîlerine imtisâlen evvelen dekâkîn-i mezkûrînin kuflü ma‘rifet-i şer‘le feth ve küşâd olundukdan sonra derûnlarında mevcûd olup kıbel-i şer‘-i şerîfden vasî nasb olunan kapan-ı merkūm tüccârından es-Seyyid Veliyüddin Yazıcı karındaşı demekle meşhûr es-Seyyid Ali Ağa b. es-Seyyid Mustafa ve tüccâr ma‘rifetleri ve semen-i misilleriyle âhara bey‘ olunan ma‘lûmü’l-keyl ve’l-fiyât erzen ve kokoroz ve şa‘îrin esmânından cem‘an elli sekiz bin beş yüz <> iki buçuk guruş on dokuz para vasîyy-i mezbûr es-Seyyid Ali Ağa yedinde olup esnâf-ı merkūmenin gerek düyûn-ı mezkûre ve gerek matlûbâtı husûsu ber-mûcib-i şerî‘at-i garrâ inde’t-terâfu‘ muvâcehe-i hasm-ı şer‘î lâzımeden olduğuna binâen kendi taraflarından vekîl-i müsbet-i şer‘îleri zuhûruna değin tevkīf olunmuşdu el-hâletü hâzihî esnâf-ı mezbûreden olup kendi nefsinden asîl ve li-üm er karındaşı Man? Oğlu İsmail b. Feyzullah nâm kimesne tarafından vekâlet-i âmme-i mutlaka ile vekîl olduğu kapan-ı mezkûr tüccârından el-Hâc Ahmed Ağa b. Hasan ve Humbaracı es-Seyyid Halil Ağa b. Ali nâm kimesneler şehâdetleriyle mahzar-ı hasm-ı câhidde şer‘an sâbit ve sübût-ı vekâletine hükm-i şer‘î lâhık olan bu def‘a me’zûnen Âsitâne-i aliyyeye gelen Âşık Mehmed oğlu Yusuf b. Mehmed meclis-i şer‘-i enverde vasîyy-i merkūm es-Seyyid Ali Ağa mahzarında kapan-ı merkūm tüccârı hazır oldukları hâlde benim kapan-ı mezkûr hâricinde çeşme karşısında köşede Kara Halil dükkânı sırasında kâin sâkin olduğum bir bâb arpacı dükkânında mevcûd mâlım olup râyic-i vakt üzre beher keyli ellişer paraya olarak ma‘rifet-i şer‘le âhara bey‘ olunan cem‘an sekiz yüz on sekiz keyl şa‘îrin esmânı olup vasîyy-i merkūm es-Seyyid Ali Ağa’nın ber-vech-i muharrer bi’l-vesâye makbûzu olan bin yirmi iki buçuk guruşun dört yüz on sekiz buçuk guruşunu emrimle cânib-i mîrîye ancak ol mikdâr deynim’çün zahîre hazînesine teslîm etmekle bâkīsi olan altı yüz dört guruş ile müvekkilim karındaşım mezbûr İsmail’in dahi mârrü’z-zikr çeşme karşısında kâin sâkin olduğu bir bâb arpacı dükkânında mevcûd mâlı olup râyic-i vakt üzre beher keyli ellişer paraya olarak ma‘rifet-i şer‘le âhara bey‘ olunan dört yüz yirmi üç keyl şa‘îrin esmânı olan beş yüz yirmi sekiz buçuk guruş on para ve beher keyli seksen beşer paraya olarak kezâlik âhara bey‘ olunan altı yüz kırk sekiz keyl şa‘îrin esmânı olan bin üç yüz yetmiş yedi guruş ve beher keyli seksener paradan yedi keyl şa‘îrin esmânı olan on dört guruş ki karındaşım müvekkilim mezbûrun mâlı olan cem‘an bin dokuz yüz on dokuz buçuk guruş on para ki min-haysü’l-mecmû‘ iki bin beş yüz yirmi üç buçuk guruş on parayı bana def‘ ü teslîm ben dahi yedinden bi’l-asâle ve bi’l-vekâle ahz ü kabz ve karındaşım müvekkilim mezbûrun mâlı olan meblağ-ı mezkûr bin dokuz yüz on dokuz buçuk guruş on paradan deyn-i mîrîsi olmadığına binâen düyûn-ı sâiresini edâ ve bâkī kalır ise kendüye îsâl ve teslîme ta‘ahhüd etmemle min-ba‘d meblağ-ı mecmû‘-ı mezkûr iki bin beş yüz yirmi üç buçuk guruş on paradan benim ve karındaşım müvekkil-i mezbûr İsmail’in vasîyy-i merkūm es-Seyyid Ali Ağa yedinde bir akçe ve bir habbe hakkımız ve alacağımız kalmadı deyü ikrâr ve tasdîkleri İstanbul Bâb Mahkemesi’nden huzûr. Fî 29 min-Şa‘bâni’l-mu‘azzam sene 1242