Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 387 Hüküm no: 447 Orijinal metin no: [71b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühâni bt. Mehmed’in Mehmed Çelebi b. Süleyman’dan muhâlaa yoluyla boşandığı Mahmiye-i İstanbul’da Davud Paşa mahallesinde sâkine olup zâtını ma‘rifet-i şer‘iyye ile ârifân İbrahim Ağa b. Osman ve Mehmed b. Halil ta‘rîfleriyle mu‘arrefe olan Ümmühâni bt. Mehmed meclis-i şer‘-i hatîrde zevc-i dâhili işbu râfi‘ü’l-vesîka Mehmed Çelebi b. Süleyman mahzarında ikrâr ve takrîr-i kelâm edip mezbûr Mehmed Çelebi zevcim olup beynimizde hüsn-i zindegânîmiz olmamağla zimmetinde mütekarrir ve makbûz olan altı bin akçe mehr-i müeccel-i müsemmâm ve nafaka-i iddet-i ma‘lûmem üzerine ve me’ûnet-i süknâm dahi kendi üzerime olup ve bedel-i hul‘ olmak üzre kendiye def‘ ve teslîm eylediğim otuz guruş üzerine zevcim mezbûr Mehmed Çelebi ile muhâla‘a-i sahîha ile muhâla‘a edip ol dahi hul‘-ı mezbûru kabûl edip min ba‘d hukūk-ı zevciyyete ve bedel-i mezbûre ve sâire müte‘allika cemî‘ da‘vâdan her birimiz âharı ibrâ ve iskāt eyledik, kat‘â da‘vâ ve nizâ‘ımız yoktur dedikde gıbbe’t-tasdîki’ş-şer‘î alâ mâ hüve’l-vâki‘ bi’t-taleb ketb olundu. Fi’l-yevmi’l-hâmis min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Osman Çavuş b. Mehmed el-Mübâşir, Hasan b. Ali, Ahmed Çelebi b. İbrahim, İbrahim Çelebi b. Ahmed.