Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 386 Hüküm no: 446 Orijinal metin no: [71a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi b. Hacı Receb’in ev arsasını Hacı Mustafa b. Hacı Abdullah’a bey‘ bi’l-istiğlâl yoluyla sattığı Mahmiye-i İstanbul’da Çerağī Hamza mahallesinde sâkin Mustafa Çelebi b. el-Hâc Receb nâm kimesne meclis-i şer‘-i şerîfde işbu bâ‘isü hâze’l-kitâb el-Hâc Mustafa b. el-Hâc Abdullah nâm kimesne mahzarında ikrâr-ı tâm ve takrîr-i kelâm edip yedimde mülk ve hakkım olup mahmiye-i mezbûrede Çukur mahallede vâki‘ bir tarafdan Saraylı Demirhan mülkü ve bir tarafdan Kâhîci mülkü ve iki tarafdan tarîk-i âm ile mahdûd menzil arsasını, bi cümleti’t-tevâbi‘ ve’l-levâhık mezbûr el-Hâc Mustafa’ya iki yüz esedî guruşa bi tarîki’l-istiğlâl bey‘ ve teslîm ol dahi ber vech-i muharrer iştirâ ve tesellüm eylediğinden sonra semeni olan meblağ-ı merkūm iki yüz guruşu mezbûr el-Hâc Mustafa bana edâ ve teslîm ben dahi yedinden bi’t-tamâm kabz ve tesellüm eylediğimden sonra mezbûr el-Hâc Mustafa arsa-i mezkûreyi gıbbe’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamâmına değin her otuz günde dörder yüz akçeye olmak üzre dört bin sekiz yüz akçeye bana îcâr ve teslîm ben dahi ber vech-i muharrer istîcâr ve tesellüm eyledim eğer müddet-i mezkûre tamâmında meblağ-ı mezbûr iki yüz guruşu ve ücret-i mezkûreyi edâ müyesser olmazsa, arsa-i merkūmeyi âhara bey‘ ve semeninden deyn-i mezkûru edâ ve fazla kalır ise bana îsâle ve kabz ve îsâl mütevakkıf olduğu umûrun küllîsine tarafımdan mezbûr el-Hâc Mustafa’yı vekâlet-i sahîha-i şer‘iyye ile vekîl ve nâib-i menâb nasb ve ta‘yîn eylediğimde ol dahi vekâlet-i merkūmeyi kabûl ve merâsimini edâya ta‘ahhüd eyledikden sonra gıbbe’t-tasdîki’ş-şer‘î [71b] mukırr-ı mezbûr Mustafa Çelebi’nin sulbî oğlu işbu hâzır bi’l-meclis Hasan Çelebi nâm kimesne meblağ-ı mezbûr iki yüz guruş ile ücret-i mezkûreye tarafeynden emr ve kabûlü hâviye kefâlet-i sahîha-i şer‘iyye ile kefîl olmağın mâ vaka‘a bi’t-taleb ketb olundu. Fi’l-yevmi’l-hâdî aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mehmed Efendi b. Sâlih, Mustafa b. Ali, Hacı İbrahim b. Sâlih, Mehmed Efendi b. Halil, nakkāş Halil b. İbrahim, imâm Musa [b.] Ali Çelebi, Aşçıbaşı el-Hâc Mehmed, Ebûbekir b. Hüseyin ve gayruhüm.