İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 118 Hüküm no: 3 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kurbanda kesilecek hayvanların sakatat ve artıklarının sokak aralarına bırakılmaması ve bayram dolayısıyla kadınların çarşı pazarda gezmemeleri Bâ-sah. İstanbul kādısı fazîletlü efendi; İşbu Îd-i adhâ’da zebh olunacak karâbînin baş ve ayak ve ciğer ve fazalâtları miyân-ı esvâk ve köşe ve bucaklara ilkā ile râyiha-i kerîhiye hudûsuna sebeb ve illet olanlardan ve bâ-fermân-ı âlî memnû‘âtdan olan nisvân tâifesinin esvâk ve pazar ve mahallât aralarında geşt ü güzârlarının men‘ ü def‘i mühim ve muktezî olmağla imdi mahallât adamlarını [imâmlarını] meclis-i şer‘a da‘vet-birle işbu îd-i şerîfin ibtidâsı gününden hitâmına değin nisâ tâifesi esvâk ve bâzâr ve mahallâtda geşt ü güzâr etmeyip hânelerinde karâr ettirilmesi ve kurbânların fazalât ve sürrelerinin esvâk ve pazar ve köşe ve bucaklara ilkā olunmaması husûslarını tenbîh ve tekîde mübâderet ve hilâf-ı fermân hareketde bulunanların tedîb olunacaklarını her bir imâm başka başka mahallesi ahâlîsine tefhîm ve ifâdeye mübâderet eylemeleriçin cümlesine mazmûn-ı fermân-ı âlîyi i‘lân ve işâ‘at eyleyesin deyü. Fî 7 Z sene [12]37