Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 389 Hüküm no: 449 Orijinal metin no: [72a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmihan bt. Mustafa’nın el-Hâc Yusuf b. İbrahim’den muhâlaa yoluyla boşandığı Mahmiye-i İstanbul’da Âbid Çelebi mahallesi sâkinelerinden olup zâtını ma‘rifet-i şer‘iyye ile ârifân Ali Çelebi b. Bâli ve Mehmed Çelebi b. Mustafa nâm kimesneler ta‘rîfleriyle mu‘arrefe olan İsmihan bt. Mustafa nâm hâtun meclis-i şer‘-i şerîf-i enverde zevc-i dâhili bâ‘isü hâze’l-vesîka el-Hâc Yusuf b. İbrahim mahzarında ikrâr-ı tâm ve takrîr-i kelâm edip zevcim mezbûr el-Hâc Yusuf zimmetinde mütekarrir ve ma‘kūdun-aleyh olan altı bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre mezbûr el-Hâc Yusuf ile muhâla‘a-i sahîha-i şer‘iyye ile muhâla‘a edip ol dahi hul‘-ı mezbûru kabûl eyledikden sonra hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âm ile ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Baba Eyyûb b. Ömer, Hasan b. Mustafa, Hüseyin Çelebi b. Mehmed, Mehmed Çelebi b. İdris.