Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 390 Hüküm no: 450 Orijinal metin no: [72a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiragos v. Manol’ün ödünç aldığı paranın Yorgi v. Kiryako’nun mirasçılarına ödenmesi Vilâyet-i Anadolu’da Torul kazâsına tâbi‘ Herek nâm karye ahâlîsinden olup vilâyet-i Rumeli’nde Kavarine nâm kasabada ticâret üzre iken bundan akdem hâlik olan Kara Yorgi v. Kiryako v. Yorgi nâm zimmînin li ebeveyn ammisi oğlu ve hasren vârisi olan Yorzan v. Andriye nâm zimmî meclis-i şer‘-i şerîf-i enverde mahrûse-i Galata müzâfâtından Yeniköy’de sâkin olup kendi sefînesinde reis Kiragos v. Manol tarafından husûs-ı âti’l-beyâna vekîl-i müsecceli olan Palaloki v. Kostanil nâm zimmî muvâcehesinde ikrâr ve takrîr-i kelâm edip [72b] mûrisim hâlik-i merkūm hâl-i hayâtında müvekkil-i merkūm Kiragos’a iki yüz esedî guruşunu ikrâz ve teslîm ol dahi iktirâz ve kabz ve tesellüm edip kable’l-ahz hâlik olmağla meblağ-ı mezbûr irsen bana isâbet etmeğin hâlâ mezbûr Palaloki meblağ-ı mezbûru bi’l-vekâle bana def‘ ve teslîm ben dahi yedinden tamâmen kabz ve tesellüm eyledim dedikde gıbbe’t-tasdîki’ş-şer‘î mahmiye-i İstanbul’da Haseki hamamı kurbunda sâkin Moskona v. Doğdu nâm zimmî meclis-i şer‘de mezbûr Palaloki muvâcehesinde ikrâr ve i‘tirâf edip işbu mezbûr Yorzan’ın merkūm Palaloki’den bi’l-verâse kabz eylediği meblağ-ı merkūm iki yüz guruşu âhardan müstahak zuhûr edip mezbûr Palaloki’den bir nesne taleb ve da‘vâ ve ba‘de’l-hükm ahz u kabz ederse ben makbûzuna bi’l-emr ve’l-kabûl zâmin ve kefîl oldum dedikde gıbbe’t-tasdîki’l-mu‘teber mâ hüve’l-vâki‘ bi’t-taleb olundu. Fi’l-yevmi’l-hâdî aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Süleyman Çelebi b. Receb, Ali b. Bâli.