İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 149 Hüküm no: 26 Orijinal metin no: [20a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstabul ve çevresinde üretim yapan ekmek fırınlarının belirlenen ölçüler içerisinde ekmek yapmaları Bâ-sah. İstanbul kādısı fazîletlü efendi. Âsitâne-i sa‘âdet ve Bilâd-ı selâsede vâki‘ habbâz esnâfının tabh ve i‘mâl eyledikleri nân-ı azîzin dirhemi dûn ve tevzî‘âtdan verilen ecnâs-ı zehâyirin fiyatı rahîs olduğu gereğ[i] gibi tebeyyün ve tahakkuk etmiş ve habbâzân kethüdâsı ma‘rifetiyle anbarlarda mevcûd zehâyirden habbâzâna verilen zahîreden bu def‘a tabh ettirilen nân-ı azîz el-yevm i‘mâl olunmakda olan nân-ı azîzin sikkesinden a‘lâ zuhûr etmiş olduğuna mebnî ber-mûceb-i nizâm-ı kadîm kurudan kuruya hesâb olunsa şimdiye kadar i‘mâl olunan yetmiş iki dirhem nân-ı azîzin üzerine iki dirhem ve Anbâr-ı âmireden verilen hınta fiyatına otuz sekiz para zam ve ilâve olunmak îcâb edeceğinden Kapan nâibi ve Anbâr emîni efendiler ile Kapan-ı dakīk tüccârı ve habbâzân kethüdâsı hâzır oldukları hâlde keyfiyetleri lede’t-tahkīk merhameten ve mesâriflerine i‘âneten sâlifü’z-zikr otuz sekiz paranın otuz parasının afvıyla Anbâr-ı [âmire]’den tevzî‘ olunacak hınta fiyatına sekiz para ve el-hâletü hâzihî i‘mâl olunan nân-ı azîzin dirhemine iki dirhem zam ve ilâve olunarak hâs ve a‘lâ nân-ı azîz i‘mâline ve Anbâr-ı âmireden alacakları zahîre bahâsının tekmîlen istîfâsına ve işleyecekleri nân-ı azîzin bilâ-noksân i‘mâline müte‘ahhid ve rızâ-dâde olduklarını zahîre nâzırı vekîli efendi bâ-takrîr ifâde ve i‘mâl olunan nân-ı azîzin numû[ne]lerini takdîm etmekden nâşî [20b] tartılan numûne üzere hâs ve pişkin olarak işlemelerine dikkat ve ihtimâm olunması husûsuna irâde-i seniyye ta‘alluk olmağla imdi habbâzân kethüdâsı ve kapan tüccârı ve ustabaşılar vesâir iktizâ edenleri celb ederek <> muktezâ-yı ta‘ahhüdleri üzere tutulan numûneye tatbîk ikişer dirhem zammıyla yetmiş dörder dirhem olarak pişkin ve hâs olmak üzere nân-ı azîz tabh olunup ibâdullâha fürûht ile cenâb-ı zıllullâhi’çün isticlâb-ı da‘avât-ı hayriyyeye dikkat ve anbardan alınacak zehâyiri dahi sekiz para zammıyla alıp hilâf-ı ta‘ahhüd ve münâfî-yi irâde tutulan nümûnenin mugāyiri sikkesi bozuk ve dirhemi noksan nân-ı azîz tabh etmeleri lâzım gelir ise mazhar-ı mücâzât olacaklarını tefhîme mübâderet eyleyesin deyü. 24 Ca sene [12]39.