İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 148 Hüküm no: 25 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadın ve erkekler için üretilen ayakkabı ve terliklerin keferenin ayakkabı ve terliklerine benzetilmemesi emri Bâ-sah. İstanbul kādısı fazîletlü efendi. Bir müddetden beri mizâc-ı nâs-ı esvâb ve lâzım-ı kadîmesi terk ile yeni şeylere heves edip ma‘a hazâ ihdâs olunan şeylerin ekseri kefere kullandıkları şeylere müşâbih olduğundan şer‘an ve örfen ve tab‘an bir vechile câiz olmadığından men‘-i küllîsine ihtimâm ve dikkat cümleye lâzıme-i zimmet olup ez-cümle ayakkabılarından nisvâna mahsûs tahta pâbuşlarından o misilli şibh olanlar bi’l-mu‘âyene tefrîk ve tenbîh olunmuş ise de ecnâs sarâhaten bilinmek ve ona göre amel olunmak lâzımeden olunmağın evvelâ gerek işleme ve gerek sâde kundura ve filâr resminde olanlar ve bu resmin gerek âdi siyah pâbuş ve gerek zükûr ve nisvânın kullandığı mest pâbuş ve çizmelerin dahi ucu sivriliği ve pâbuşların yüzü aralığı dahi külliyen men‘ olunması ve nisvânın şıp şıp tâ‘bir olunur pâbuşuna beis olmayıp lâkin onun dahi yüzü pek az olmaması ve’l-hâsıl kefere ayakkabılarına müşâbih olur sûretlerden gāyetle ittikā kılınması ve şimdi haffâflarda bulunanlar cümleten kaldırılıp re‘âyâ zükûr ve nisvâna sürülmek üzere re‘âyâdan olan haffâflara nakl ve târih-i buyruldudan yirmi beş gün imhâl ile hitâm-ı mühlet re‘âyâ haffâflarında dahi bulunmaması ve fîmâ ba‘d zinhâr i‘mâl olunmaması men‘-i küllî ile men‘ olunduğu cümleye tefhîm ve tenbîh olunmak lâzımeden olmağın imdi haffâf ve dikici esnâfının kethüdâ ve yiğitbaşıları vesâir iktizâ edenleri celb ile ber-minvâl-i muharrer gerek âdi siyah pâbuş ve gerek zükûr ve nisvânın kullandığı mest pâbuş ve çizmelerin ucu sivriliği ve pâbuşların yüzü az olmaması ve kefere ayakkabılarına müşâbih olan kundura ve filâr resminde olanların cümlesi re‘âyâdan olan haffâflara nakl ile mehl-i mezkûra kadar sürülmesi ve mehl-i mezkûr içinde ehl-i islâm haffâfları ve sonra re‘âyâdan olan haffâflar yedlerinde bulunmak ve dikici esnâfı dahi gecelerde hân ve odalarında hafî i‘mâl ederek fürûhtuna cesâretleri görülmek ve haber alınmak lâzım gelir ise eşedd-i ukūbet ile mücâzât olacakları gûş-ı hûşlarına ilkāya mübâderet ve bu husûsa ale’d-devâm nezâret ve ihtimâm ve dikkat eyleyesin deyü. Fî 21 Ca sene [12]39.