İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 152 Hüküm no: 31 Orijinal metin no: [21a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Her sınıfın kendilerine mahsus kıyafetlerinin dışında kıyafet giymemeleri Bâ-sah. İstanbul kādısı fazîletlü efendi. Cemî‘ zamânda herkes kendiye mahsûs olan kıyâfetiyle gezip ve başlarına şal sarmak ve kendiye mahsûs olan kıyâfet ve hey’et ne ise onu tebdîl ve tağyîr ederek başka hey’et ve kıyâfete girmemek lâzımeden iken biraz vakitden beri bu usûle bakılamamış olduğundan her bir sınıf kendiye mahsûs olan kıyâfeti tebdîl ederek istediği kıyâfete ve dürlü dürlü hey’ete girerek bî-edebâne gezmekde oldukları meşhûd ve ma‘lûm olarak o makūleleri men‘ ve tahzîri lâzım geldiğinden keyfiyet iktizâ edenlere bâ-fermân-ı âlî tenbîh olunmağla imdi siz dahi bi’l-cümle eimme-i mahallâtı nezdinize celb ile ba‘d ez-în her bir sınıfın kıyâfetle gezip kendiye mahsûs olan hey’eti bozmamağı tenbîh ve mütenebbih olmayıp kendiye mahsûs olmayan kıyâfetle geşt ü güzâr edenler olur ise tedîb ve tekdîr olunacaklarını bundan sonra her bir sınıfdan kendiye mahsûs olan kıyâfeti ne ise ol sûretle gezmesi emr-i ma‘rifetle tenbîh ve tekîde mübâderet eyleyesiz deyü. Fî selhi Ş sene [1]239.