İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 156 Hüküm no: 35 Orijinal metin no: [22b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhtekirlere fırsat verilmemesi ve piyasaların rahatlatılması için Adlî rub‘iyyesi ve Zolota basımı İstanbul kādısı fazîletlü efendi. Bundan akdem Darbhâne-i âmiremde yüz para fiyat ile kat‘ ve darb olunan rub‘iyyenin Adliye rub‘iyyesi râyici yüz paraya olup işbu rub‘iyyede her ne kadar cânib-i mîrîye hasâr terettüb eylediği âşikâr ise de külliyetli kat‘ ve darb olunur sikke olmayarak mücerred mu‘âmelât-ı nâsda sühûleti mûcib olmak için terettüb eden zarâr ve ziyâna bakılmayarak ibtidâsından şimdiye dek mâhiye yüz elli iki yüz binden ziyâde rub‘iyye kat‘ ve darb ve neşr olunmuş iken yine çarşı ve pazarda aransa bir dâne rub‘iyye bulunmayarak erbâb-ı ihtikâr bu rub‘iyye maddesini kendilere bir nev‘ kâr ittihâzıyla bir tarafdan hafî ve celî rub‘iyye cem‘ ve iddihâr ve üçer guruşa alıp vermeği ve taşralarda rub‘iyyenin revâcı açıkdan açığa üçer guruşa olduğundan muhtekir tâifesi birer takrîb ellerine geçen rub‘iyyeyi taşralara irsâl ederek Dersa‘âdet’de rub‘iyyenin fıkdânıyla mu‘âmelât-ı nâsda su‘ûbeti mûcib keyfiyete bâdî olduklarından ve bu vechile rub‘iyye maddesine fesâd tareyân eylemiş olduğundan işbu fesâdın def‘ ve imhâsıyla hem teksîr-i envâ‘-ı sikkeyi mûcib ve hem bir daha ziyâde ve noksan alınıp verilmemeği müstevcib olur sûret-i hasenenin istihsâli lâzım gelmiş ve el-hâletü hâzihî on iki guruşa râyic olan Adlî altının nısfı altı guruşa olduğundan Adlî altını sikkesine şibh olarak Adlî rub‘iyyesi kat‘ ve darbıyla Adlî altını hesâbınca üç guruşa râyic olması ve altmış paraya râyic olan altmışlıkda dahi teksîr-i envâ‘-ı nukūd zımnında nısfı olarak Zolota kat‘ olunup otuz paraya alınıp verilmesi bu def‘a ittifâk-ı ârâ ile karâr-gîr olmuş ve irâde-i seniyye dahi bu vechile ta‘alluk ederek fîmâ ba‘d on iki guruşa râyic olan Adlî altınının rub‘iyyesi olmak üzere müceddeden kat‘ ve darb olunacak rub‘iyyenin üç guruşdan ziyâdeye ve Zolota dahi eyâdî-i nâsda te‘âmül olunan altmışlıkda nısfı olduğundan otuz paraya alınıp verilmesi ve ziyâdeye alınıp verilmekden tehâşî ve mübâ‘adet olunması iktizâ edenlere bâ-fermân-ı âlî tenbîh olunmuş olmağla siz dahi müceddeden kat‘ ve darb olunan Adlî rub‘iyyesinin Adlî altını hesâbınca üç guruşa ve Zolota’nın altmışlık hesâbıyla otuz paraya alınıp verilmesini ve ziyâde ve noksana alınıp verilmekden tehâşî olunması husûsunu iktizâ edenlere ekîden tenbîhe dikkat eyleyesiz deyü. Fî 12 L sene [12]39.